Anto Minister Sevinger ta firma acto na notario    

Desde un luna pasa a cuminsa ricibi diferente documento entre otro di negoshi cu ta tuma luga cu tereno di pueblo regala na Leoncita Arends, e señora ‘protocol’ cu ta bisa cu e no tin mester di gobierno pa nada y cu e no tin ningun tereno riba su nomber. E señora constantemente ta wordo acusa den diferente medio di comunicacion, pero no ta hiba nan corte y tur dia ta mustra dede riba otronan. Durante conferencia semanal di partido POR, lider di e partido Otmar Oduber a presenta cu diferente documento como prueba di corupcion cu ta tuma luga. El a splica ampliamente na medionan di comunicacion, e contenido di e documentonan aki.

10 di maart 2014, documento ta drenta oficina di Minister Sevinger y riba e mesun fecha e Minister ta pone direct pa DIP akkoord conform gaarne uw medewerking. Riba e documento ta indica cu ta pidi un tereno na Sasakiweg pa desaroya un proyecto di Horeca. Kiermen DIP no a wak e documento, e Minister no sa mes si e tereno ta disponibel pero dibiaha ta pone firma y stempel y ta bisa DIP dal bay.

22 di januari 2014 esta prome cu e fecha menciona 10 di maart, ta mira cu a traspasa un NV cu a wordo lanta e aña anterior pa Maria Leoncita Arends, Sero Blanco 54-D. E NV tin 100 shares, di cual cada uno tin un ‘nominale waarde’ di 100 florin (total 10 mil florin). Mester bisa cu e compania aki ta un bashi, es decir no tin ningun ‘asset’ registra riba su nomber.

Corupcion cu propiedad di pueblo
Na KVK a bay wak ken ta doño di e compania, ta resulta cu dia 4 di augustus 2014 e nomber cu ta aparece como director ta yiu muhe di Leoncita Arends. Un compania sin balor, pero cu sin embargo na comienso di 2015 ta bende e NV/tereno (di 10 mil florin) aki na un balor di casi 600 mil florin. Ora cu a paga tur hende cu a atende cu e negociacion, 485 mil florin a wordo deposita riba number di cuenta bancario di Leoncita Arends na Banco di Caribe. Remarcabel ta cu e tereno aki ta den ‘optie’, loke kiermen cu e tereno ta di pueblo ainda, no a pasa un akte na notario ainda pa bira tereno di un NV cu ta wordo bendi pa 600 mil florin.

Asina tin hopi documento cu ta yegando den nos man, esaki no ta e unico y nan mester cuminsa yega Ministerio Publico. No por ta posibel cu tin mas di 11 mil peticion aden pa cas/tereno, cu tin famianan ta biba preta riba otro pasobra no por haya cas, cu tin mas cu 7000 peticion a wordo firma akkoord conform for di 2011 bin ariba y eseynan si no a haya tereno. Di otro banda, otronan si ta haya tereno pa bende esakinan y bira miyonario cu tereno di pueblo. E mas tristo ta cu Prome Minister y Minister Sevinger ta na altura cu e cosnan aki ta tuma luga.

‘Tabata inacceptabel pa ami sinta y mira cu tin e tipo di cosnan aki ta tuma luga bou di un gobierno cu ami ta sostene. Nos partido ta para pa integridad, bon gobernacion y pa crea confiansa bek den comunidad a base di un plan caminda mester hisa calidad di bida di nos hendenan.’ sr. Oduber a finalisa. 

Expresionnan haci den e articulo aki no necesariamente ta refleha opinion di ArenaPoliti.co