ORANJESTAD –Awe e ley cu ta autorisa Minister di Asuntonan Economico y Comunicacion pa efectua e pago na ex-empleadonan di SETAR a sali rumbo pa Parlamento.  “Cu hopi satisfaccion ami cu mi coleganan di Finanzas y Husticia a firma e documentonan cu ta haci posibel pa inicia tratamento di e ley den Parlamento,” Minister Arends encarga cu Telecomunicacion a anuncia. “Pa hopi di e pensionadonan un procedura legal cu a dura mas cu 13 aña ta yegando su punto culminante.”

For di cuminsamento di aña Gobierno a prepara e proyecto di ley cu ta autorisa Gobierno pa efectua e pagonan na pensionadonan. “Despues cu e proceso legislativo a inicia, e proyeco di ley a bay Raad van Advies y via Gabinete di Gobernador bek pa Gobierno. “Asina cu e conseho di Raad van Advies tabata den nos man, nos a traha diligentemente pa prepara Gobierno su reaccion. Awe nos por mira un compromiso mas di Gabinete Mike Eman II birando realidad,” Minister Arends a sigui bisa.

Na momento cu a independisa Servicio di Telecomunicacion di Aruba na aña 2003 mas cu 90 empleado a haci uzo di e afvloeiingsregeling den un plan social combeni durante e transicion pa SETAR N.V.  E mesun tempo a surgi un disputa entre e ex-empleadonan, sindicatonan y Pais Aruba cu a causa hopi iritacion, frustracion y  indignacion cerca e ex-empleadonan di Servicio di Telecomunicacion di Aruba.

Despues cu hues a dicta na fabor di un grupo di ex-empleado, Minister-President Eman y Minister de Meza, hunto cu sindicato SEPPA y Gobierno di Aruba a tuma e decision di principio cu lo paga tur ex-empleado cu a haci uzo di e afvloeiingsregeling bou di e mesun condicionnan. Ta trata aki di un suma cuantioso di mas di 4 miyon florin.

Expresionnan haci den e articulo aki no necesariamente ta refleha opinion di ArenaPoliti.co