Durante e siman aki, Parlamentarionan di MEP, Sr.Ady Thijsen, Sr. Chris Romero y Sra. Evelyn Wever-Croes ta na Hulanda pa asisti na e reunionnan di IPKO na unda varios temanan di importancia pa Reino a wordo atendi. Sra Evelyn Wever-Croes ta elabora riba esaki:

“Ayera, diaranzon 14 di juni, tabata un otro dia fructifero di e reunionnan na Hulanda. E reunionnan di IPKO mes a cuminsa den sala di Eerste Kamer. E diferente Parlamentonan di Reino a trece diferente puntonan padilanti di interes general. Nos a papia riba varios tema cu nos por traha hunto entre otro salud, problematica di hobennan y enseñansa. Pero tambe nos a toca e tema importante di intergridad.

Mi tin pa bisa cu e tema aki ta asina delicado cu nos no por a caba di debati riba dje den un reunion so por lo tanto el a wordo poni bek riba agenda pa awe.

Partido AVP a bin cu e storia cu Aruba ta candando e caminda di introduci leynan di integridad. Pero ora cu bo scucha kico tur Sint Maartin, Corsow y Hulanda tin na ley, anto ta un berguensa cu na Aruba nos no tin leynan pa garantisa Aruba contra gobiernonan corupto.

Partido MEP, ya desde aña 2014 a traha un nota di ley con te caminda cu Aruba mester cana pa yega na un gobierno integro. E nota di ley aki ta encera varios puntonan na unda nos ta garantisa e pueblo cu Aruba lo tin un gobierno integro una bez e ley drenta den vigor.

Ley drechi di “screening” pa partidonan politico.
Nos lo cuminsa cu partidonan politico prome introduciendo un “screening” debido di candidatonan cu ta bin riba lista politico.
Dos siman pasa, Parlamento a pasa un ley di screening. Sinembargo cu un buraco grandi pa acomoda e Minister di Labor di AVP. Partido MEP ta rechasa esaki y lo sigui boga pa un ley di screening di berdad.

Ley di Financiamento pa Partidonan Politico.
Mester tin tambe un bon control di e placa cu ta drenta den campaña a base di e ley di financiamento di partidonan politico. AVP ta core un campaña na unda miyones di florin ta wordo uza den nan campaña pa eleccion 2017 mescos cu el a haci den pasado.
Pero nos no sa di unda e placa aki ta bin. Pero, conociendo e forma con partido AVP a core campaña den pasado y e experiencia cu nos tin caba, no tin duda cu e placa aki ta procedente di personanan cu ta spera algo a cambio, sea ta un proyecto of un otro fabor. Pa elimina e corupcion cu e baho mundo ta cumpra gobernacion, ta necesario pa bin cu e ley di financiamento pa partidonan politico pa asina tin un miho control di unda e fondonan di campaña ta bin.

Codico di conducta di Minister y Parlamentarionan.
Esaki sigur lo evita cualkier impression cu Parlamentario of Ministernan lo haci cosnan pa ricibi placa bou di mesa pa paga fabornan.

Leynan pa protehe cualkier ciudadano cu bin dilinti cu prueba.
Den e Klokkenluidersregeling, ora cu un ciudadano bin cu prueba concreto, e no mester tin miedo cu e lo perde su trabou pero lo wordo protehi. Esaki ta conta tambe ora cu e ciudadano sa di casonan di corupcion, e por denuncia esaki tambe na Ombudsman si e sinti cu Ministerio Publico no ta haci suficiente caso di dje.

E pakete di leynan aki, Partido MEP a propone pa wordo introduci. Y un biaha mas mi a trece esaki den e reunionnan na Hulanda y a basicamente urgi Hulanda pa no bay tuma medida conta Mike Eman awo sino warda e tres lunanan cu falta pa eleccion pa bin un gobierno nobo y permiti e gobierno nobo pa bin cu e leynan aki pa asina nos crea un gobieno intergro.

Atrobe MEP a score hopi halto cu e tema di integridad. Mi a discuti e tema aki tambe cu diferente personanan di contacto di e fraccionnan di Tweede Kamer na unda tabata tin varios caranan nobo despues di e ultimo eleccion”.

Lider di MEP, sra Evelyn Wever-Croes ta termina ta bisa: “Mi a entrega nan e nota cu mi a traha na 2014 y adapta na 2015 na nan caminda cu nan mes por a weita cu MEP ta hopi serio riba e tema di integridad. Nos no ta papia so. Nos ta traha tambe. Y awe, despues cu e tema aki wordo trata atrobe, nos lo wak kico lo ta e conclucionnan”. 

Expresionnan haci den e articulo aki no necesariamente ta refleha opinion di ArenaPoliti.co