Survey haci pa e plataforma POR ta deduci cu mester di e cambio ey, AWOR. 

ORANJESTAD, Aruba – 28 di Juni 2017: Plataforma POR ta kere firmemente cu educacion y enseñansa ta e motor di cualkier sociedad prospero y ta conduci na desaroyo social y crecemento economico. Tanto e alumno como maestro merece di forma parti di un sistema educativo unda excelencia, calidad  y desaroyo continuo ta e base di tur decision. Pa introduci cambionan maestronan y alumnonan a wordo scucha. A base di un survey conduci pa MGM sources, alumnonan di scol primario guia pa nan maestro a contesta nan preguntanan y den scol secundario e alumno por a contesta libremente. 

E focus sigur ta e aspecto social di e alumno y con por trese un mehoracion de esaki, al igual e forma di e curriculum actual y con e alumno ta mira esaki. No ta un secreto cu hopi hoben ta bay cas na un cu ta bashi sin guia te ora cu e mayor yega for si trabao. 

Kiko ta pasa den e hoben su mente y con e ta pasa su tempo ta e deducion cu lo ta na su lugar un diversificacion di orario di scol. Na unda e orario di scol ta bira uno te cu  5 or di atardi,  pa duna e mayornan e espacio pa sin problema aumenta nan capacidad nan a trabao y de paso e hoben ta haya diferente otro topiconan den su curriculum cu e mes ta boga pe.

Ta alarmante pa por conclui cu 50% entre e encuestradonan ta bay scol sin cuminda pa falta di tempo. Mayoria mayor ta traha y ta transporta nan juinan pa nan scol cu no ta den nan vecindario den un trafico carga. Cu introduction obligatorio di busnan pa transporta e alumnonan lo alivia sigur e factor tempo y stress tanto pa e alumno como e mayor. Aunke esaki no tabata un punto mucho popular bao di e alumnonan,  20.36% lo hasi uso di e bus si e ta para dilanti su cas, y 65.25% a bisa NO na transporte publico, e ta keda un punto di consideracion pa mehoracion.

45.9% di e ecuestradonan kier Arte na scol. 48.6% lo desea oranan dedica pa Teatro y 56.8 % lo kier musica como parti di nan curriculum. Solamente 37.8% lo desea technologia. 56% lo kier deporte na scol. Y un total di 85.16% kier pa e lesnan wordo digitalisa.

Riba e pregunta si e alumno lo kier sinja mas di su Cultura e contesta tabata absoluto. Un total di 83.6% lo kier sa mas di nan historia, conoce lugarnan historico, sa mas di un himno y bandera y mira cultura wordo promovi mas den eventonan cultural.

Sumamente importante ta e hecho cu 40.7% di docentenan lo aumenta nan horarionan y keda na scol mas largo si nan wordo paga pa esaki y ta mira e amplacion di curriculum necesario na unda representacion di nos cultura, norma y balornan den Enseňansa.

POR lo enfoca riba; calidad di enseñansa, eficiencia y uzo di tecnologia den klas, scolnan multilingual, coherencia entre nivel di enseñansa y necesidad di sector laboral y infrastrucutra adecua.

De un proximo ediccion lo elabora mas riba e situacion di e maestro na scol y con e lo kier mira e cambionan. 35% di docentenan ta ya entre 11 pa 20 anja dilanti di klas y ta desea e diversificacion, lo kier mira nan vision wordo realisa.

Expresionnan haci den e articulo aki no necesariamente ta refleha opinion di ArenaPoliti.co