UPP den su programa pa gobernacion 2017-2021, mescos cu e den e acuerdo di lista combina PPA/UPP, ta para pa diversificacion di nos economia, basa riba un diversificacion di industria hi-tech y limpi y cu no ta labor intensivo. Den e cuadro aki ta interesante pa mira diversificacion di nos economia cu e industria creativo. Na aña 2012 e Gobierno di Trinidad y Tobago desempleo tawata na 5%. Na 2013 nan a introduci un compania estatal di Industria Creativo. Na 2016, aunque desempleo den e industria petroleo subi, T&T ainda a logra e cifra di desempleo mas abou den Caribe. Un di e metanan di diversificacion di industria ta, pa baha e desempleo na Aruba y asina percura pa nos ta menos vulnerabel pa cualkier fluctuacion den e industria di turismo. Esaki nos por logra door di diversifica economia atraendo industria nobo, manera Industria Creativo.

Conforme e Labor Force Survey 2015 e cifra oficial di desempleo na Aruba tawata 7.4%. Compara cu Curacao (11,7%) y Bahama's (14,8%) esaki ta basta bon. Compara cu Trinidad y Tobago (3,5%) y Bermuda (6,6%) y Hulanda 5% tin hopi espacio ainda pa baha e cifra aki.  E proximo Gobierno lo mester haci hopi mas esfuerso pa crea empleo y entrada na Aruba. Locual Aruba tin mester di dje mas cu tur, ta trabou y trahadornan cualifica pa haci e trabou. Nos tur por bay di acuerdo cu esey. Trabou ta trece structura den un bida y beneficionan medico y pa cu salud. Ademas, trabou ta preveni cu un persona lo recuri na criminalidad.

Arte tin un efecto positivo riba e desaroyo di un mucha y e ta un manera cu hobennan ta uza pa expresa nan mes cu n'e, e lo ta importante pa nos realisa cu esaki no ta solamente un manera pa diverti, pero e ta un industria riba su mes cu lo por crea empleo sin limite y rond mundo pa esnan na Aruba. Pa logra esaki, nos lo mester cuminsa manera a wordo haci na Trinidad y Tobago cu un compania estatal, cu ta crea productonan pa e mercadeo di turismo pa bende global, pero cu tambe ta educa. E placa cu ta wordo genera cu e Compania Statal di Industria Creativo, lo mester wordo usa pa paga pa e programanan educativo di kleuter, scol basico te cu educacion professional.

Algun aña atras nos tawata tin un Film Festival, un proyecto cu a wordo lansa door di e millennial Jonathan Veira. E parti bunita di e proyecto multidisciplinario aki, tawata e tayernan educativo cu a wordo ofreci na nos hobennan durante di e Film Festival. Awendia Aruba conoce diferente festival di musica y fashion, pero e parti educativo ainda falta. Nos tin cu wak y reconoce e recursonan cu nos pais tin: Nos Pueblo. Un pueblo unico cu ta conoci pa su creatividad den tur areanan. Si nos usa locual ya caba nos tin, pa logra locual nos kier, nos lo por ta un pais y un pueblo mas exitoso. E lista combina PPA/UPP lo percura entre otro dor di bini cu solucionnan pa baha desempleo. Asina nos lo percura pa Aruba bira e patria cu nos tur ta anhela di tin y kier laga pa nos yiunan. Ta p'esey e ta sumamente importante pa dia 22 di september, nos vota consciente. Pa mi, esey ta primordial. Nos mester laga idealismo vence materialismo. Ban uni y habri porta pa Un Miho Mañan!

Gisele-Mireille Sint Jago, Candidata #5 Lista PPA/UPP

Expresionnan haci den e articulo aki no necesariamente ta refleha opinion di ArenaPoliti.co