IMF den su rapport preliminario como promer punto di atencion a remarca cu Aruba ta recuperando gradualmente di un rececion severo. Segun IMF asina mes cu turismo a logra yuda Aruba tene cabes riba awa, e momentum di crecemento economico a bay perdi debi cu e demanda domestico no tabata tey. Es decir, e economia no a lora manera por a spera. E motibonan cu IMF a duna ta cu e confiansa poco poco a bay perdi, tin inseguridad riba e tereno fiscal y tardansa den inversionnan. AVP parce di no kier compronde cu aki IMF ta referi na e hecho cu no tin confiansa den Gabinete Eman. Pero enves di mira e realidad, awe exponentenan di AVP kier tira culpa riba Hulanda y CFT siendo cu ta Gabinete Eman mes ta e problema cu a stanca e economia di nos Pais.

E no ta un secreto cu inseguridad y falta di confiansa ta pone cu un economia ta stanca. Esaki ta netamente locual ta pasando na Aruba na unda cu e confiansa den Gabinete Eman ta perdi. Ta hopi manipulacion a tuma lugar cu cifra financiero cu a pone cu e confiansa den e palabra di e Ministernan di Gabinete Eman a bay perdi. Companianan di rating Ficth y Standard and Poor’s tambe a perde confiansa y a downgrade nos Pais. CFT den su rapport tambe a mustra cu Gabinete Eman no ta ‘geloofwaardig,’ ya cu no por a presenta un presupuesto y un plan pa nos finanzas publico cu ta ‘geloofwaardig.’ Banda di esaki Gabinete Eman a anuncia 24 medida cu nan a priminti na CFT y Hulanda, pero ta nenga di mustra con lo implementa e medidanan aki. Esaki ta crea inseguridad, ya cu niun hende sa si lo bin mas belasting of cu cuanto lo hisa e costo di bida y costo di haci negoshi na nos Pais. Tardansa den inversionnan cu Gabinete Eman a anuncia desde 2010 caba y cu te na 2014 no ta wordo realisa of cu tin retraso den nan construccion, tambe ta pone cu hende no por tuma e gobierno aki na serio mas. Pesey no ta nada stranio cu den punto 7 di su rapport IMF tambe ta papia di e credibilidad di locual Gabinete Eman ta presenta como plan pa drecha nos finanzas publico.

Manera premira AVP su exponentenan enves di admiti cu nan maneho financiero a fracasa, a busca otro pa culpa di nan eror. Pesey nan ta tira e culpa di nos economia stanca riba Hulanda y CFT, bisando cu ta e intervencion innecesario, inefectivo y illegal di Hulanda y e consehonan descabeya di CFT tabata e fuente di inseguridad cu IMF ta señala. Pero nan ta lubida cu no ta Hulanda of CFT a maneha Pais Aruba e ultimo 5 añanan. No ta nan a gaña riba e situacion financiero. No ta nan a campania cu nan lo elimina BBO y no lo bin cu medida. No ta nan a crea un megadebe riba e lomba di e Pais aki. Ta Gabinete Eman mes ta e problema cu a conduci cu awe nos tin tanto problema y cu tur hende ta desconfia den nan. E desconfiansa aki a pone cu nos economia a stanca y cu e momentum pa crece nos economia a bay perdi den 2014.


18 februari 2015

Expresionnan haci den e articulo aki no necesariamente ta refleha opinion di ArenaPoliti.co