Oh Aruba dushi tera!

Nos tur ta preocupa pa e futuro di nos pais. Un par di añanan atras Aruba por a goza di un economia stabil cu un refiniria productivo y un turismo cu ta jena nos hotel  y restaurantnan. Trahado tawata contento di por sirbi e turista cu e calor Arubano. No solamente e turista tabata jena Horeca pero tambe nos tiendanan local por a goza di esaki. E turismo principal semper tabata procedente di Merca. Den ultimo tempo cu tin hopi problema den e economia di Merca, nos tur por a ripara cu e turista nan aki ta bini menos cu prome. Si  ta berdad cu tin repeat guests cu a keda bini apesar di e problema na nan pais, pero Aruba a sa di adapta tarifanan pa asina jena cambernan cu ta bashi. Merca ta pasando den momentonan financiero hopi dificil y tambe tin percentahe halto di desempleo. Aruba no a para keto y di biaha a traha riba un otro mercado di turismo cu ta e turista procedente di Sur America y muy en particularmente di Venezuela.

Awor cu nos a perde e refineria nos a keda cu solamente un pilar economico, cu ta turismo. Pero hasta e pilar aki nos mester dune hopi atencion pasobra tin hopi concurrencia; por ehempel Cuba a habri su porta pa turismo di Merca, algo cu IMF tambe a señala pa tene cuenta cu su posible efecto riba nos economía den su rapport mas reciente. Hopi ta e comentario cu mi a scucha riba cifranan postivo pa cu nos turismo, pero ainda mi no por a scucha un plan concreto p’e situacion di aumento di concurrencia menciona. Den e situacion cu Merca ta den awor, simplemente e mercado no ta permiti pa gasta pero nan ta purba di spaar mas cu ta posibel. Apesar cu mericano lo bai cu vakantie, tin e chens cu nan lo purba di bai destinacion cu ta mas barata of nobo. Si tuma e ehempel cu IMF a menciona, esta Cuba, mester tene cuenta cu e ta un pais cu tin mas cu 50 aña sera pa turismo for di Merca y awor ta habri su porta y ta hacie extremadamente curioso di cual tur hende kier bishita pa su paisahe, su historia y su cultura.

Debi na e mercado competitivo di turismo Gobierno di Aruba no cuminsa actua riba e costo di haci negoshi cual ta traduci den prijsnan halto pa nos localnan y nos turismo. Nos percentahe di belasting cu tambe ta demasiado halto y según un encuesta di Banco Central e incertidumbre cu Gobierno a crea den e ultimo lunanan desde juli 2014, ta pone cu e no tin estimulo suficiente actualmente pa inverstionistanan local y internacional habri negoshinan nobo. Aki ta caminda Gobierno tin un tarea crucial pa trece un ambiente di inversión bek na un nivel sano.

Democracia Real su opinion semper tabata cu mester stimula negoshinan chikito y mediano pa crece e economia. Na banda di nos unico pilar restante cu ta turismo nos mester di otro pilarnan economico urgente, manera sector di servicio financiero económico. Nos tur por a mira cu e stimulacion pa negoshi nobo te awor no ta echt existi den boca di e gobierno actual cu leynan concreto of menaho pa elimina obstaculonan innecesario pa habri negoshi nobo. Nos di PDR si ta keda pone acento riba e tema aki pasobra e pilar aki lo bai beneficia e pais grandemente. Negoshinan local ta esnan cu ta crea cuponan di trabow y directamente of indirectamente ta jena caha di gobierno, y nos Pais lo goza di e fruto. P’esey, nos ta urgi pa observa bon kico gobierno su plan ta y mira pa bo mes unda nos ta bayendo.

Expresionnan haci den e articulo aki no necesariamente ta refleha opinion di ArenaPoliti.co