ORANJESTAD – Partido MEP a tuma nota di e casonan recien di agresion contra un cabesante di scol. Un acto criminal totalmente inaceptable. Pero un sucedido cu un biaha mas ta mustra con vulnerable nos docentenan ta, y cu ta mustra e realidad cruel cu nos hubentud ta lantando aden.

Mientras cu nos no por influencia tur desaroyo den nos comunidad, nos deber ta si pa proteha esnan cu ta wordo agredi. Ta un hecho conosi cu inseguridad a surpasa tur limite. Ya ni cabesante di scol ta wordo respeta mas. Pues nos mester hasi mas di locual nos tabata hasiendo caba pa hasi nos scolnan mas sigur.

Sin embargo nos a tuma nota cu nos ta bayendo net e otro direccion, pasobra di parti di gobierno menos atencion ta wordo poni riba seguridad di nos scolnan y di docentenan. Cualquier gobierno husto lo percura pa den temponan di mas violencia y di inseguridad, pa inverti den seguridad. Pero e gobierno cu nos tin na Aruba no ta pensa asina. Gabinete Mike Eman a redusi e inversion den seguridad di scolnan y di docente di 1.5 miyon pa 500 mil florin! Hustamente den e temponan MAS peligroso!

Di otro banda bo por mira cu ta inverti 7.8 miyon florin den entre otro RIETVELD ACADEMIE, y mester corta 1 miyon florin di seguridad na nos scolnan. E prioridadnan di e gobierno aki ta totalmente equiboca, y ta tempo pa nos pone e enfoke caminda e mester ta: seguridad di docente, studiante y scolnan. Aruba merece mihor, Aruba merece un calidad di ensenjansa mucho mas mihor. Nos di fraccion di MEP lo hasi tur lo posible pa aloca fondonan necesario pa por hasi nos scolnan sigur atrobe.

Expresionnan haci den e articulo aki no necesariamente ta refleha opinion di ArenaPoliti.co