Gobierno mester soluciona su problema cu banconan, pero no cobra pueblo 

ORANJESTAD – Fraccion di MEP ta sumamente decepciona den Minister Angel Bermudez despues di tuma nota di tur e discusion cu tin entorno e tax nobo di banconan, koers marge vergoeding.
"Cu tin un problema entre banconan y gobierno ya ta obvio y ambos posicion ta comprendibel, pero boso soluciona boso problemanan y no bin bahe riba lomba di pueblo. Pueblo no tin arte ni parte den tur esaki" segun lider di MEP Evelyn Wever-Croes.
Minister Bermudez a segura henter Parlamento cu banconan mes lo carga e tax nobo, y awor ta resulta cu no ta asina. Es mas, awor ta resulta cu e minister nunca a discuti esaki cu e banconan mes. 
"E minister a ganja parlamento, y esey nos no ta acepta. Nos lo yama e minister den Parlamento y dun’e un ultimatum pa e regla e asunto aki. Si e no regle pronto, nos mes ta regl’e p’e, pasobra ta un cambio sensiyo mester hinca den e ley pa soluciona e problema aki" segun Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co