Aunke riba nivel di parlamentonan a yega na un acuerdo pa institui un organo independiente na nivel di Reino pa atende cu diferencianan di opinion entre paisnan di Reino Hulandes, ta parse cu riba nivel di ambtenaarnan no por haya otro pa ehecuta e acuerdo cu a yega na dje. Ya for di na Hulanda e lider di e Comision di Asuntonan di Reino y Asuntonan di Exterior, Rene Herde', a bisa cu esaki por bira un problema. Den e conferencia di prensa di fraccion di AVP ela ripiti esey diahuebs mainta. Cu esey e temor cu Rene Herde' tabata tin, ta parse di bira realidad. Esaki ta nifica cu mester busca solucion pa ehecuta e acuerdo cu e parlamentonan di e cuatro paisnan a yega na dje. Rene Herde': "Na Hulanda caba e presidente di e reunionnan di IPKO sr. Jeroen Recour a bisa cu si gobiernonan no logra crea e organo independiente manera parlamentonan a describi, e asunto lo bolbe bek serca parlamentonan pa sigui busca un solucion. Den asuntonan asina importante y pa kibra e impase cu tabata tin for di april 2010, politiconan di Aruba, Corsow, Sint Maarten y Hulanda a tuma un desicion politico dos siman pasa durante reunion di IPKO na Hulanda. Esaki mester wordo ehecuta door di gobiernonan y nan abmtenaarnan. E ambtenaarnan no por dicidi riba nan mes. Pa no bolbe warda te ora parlamentonan bolbe topa otro, mi ta pidi gobierno di Aruba y gobierno di e otro tres paisnan cu ta topa otro otro siman na Corsow, pa kita tur obstaculo y detaye tecnico for di caminda, door di tuma un desicion politico pa crea e organo nobo aki y laga e expertonan y ambtenaarnan ehecuta esaki. Ta asina democrasia ta traha." Cu esey Rene Herde' ta bisa cu e ambtenaarnan mester reconoce nan rol den gobernacion. E desicionnan final semper ta na politiconan, pasobra ta nan ta maneha e paisnan y ta nan ta wordo escohi door di pueblo. Rene Herde':" Esey semper ta asina. Sigur den asuntonan importante manera esaki. Pueblo no kier wak nos paisnan di Reino den conflicto cu otro. Esey no ta produci nada bon pa niun di nos paisnan. Djis wak con e conflicto entre Aruba y Hulanda a afecta nos aña pasa. No por evita cu ta surgi diferencia di opinion. Pero si por y mester preveni cu e diferencianan di opinion ta bira conflicto. Pesey e organo independiente pa atende cu diferencianan di opinion y conflicto ta asina importante. E lo yuda preveni conflictonan riba cualkier tereno. Pesey no por exclui area y temanan importante for di e areglo aki tampoco. A scohe pa inclui tur asunto cu tin di haci cu interpretacion di Statuto di Reino. Esaki ta un formulacion hopi amplio. E ta ensera casi tur cos den e relacion entre paisnan di Reino. Awor cu ta parse cu ambtenaarnan no por yega na otro pa ehecuta e acuerdo, ta politiconan mester soluciona e impase aki."

Rene Herde' a bisa di lo manda un carta pa gobierno di Aruba, pa gobierno di e otro tres paisnan di Reino y pa parlamentonan di e cuatro paisnan, pa urgi un solucion otro siman ora e ministernan di Reino topa otro na Corsow.

Expresionnan haci den e articulo aki no necesariamente ta refleha opinion di ArenaPoliti.co