ORANJESTAD – Diahuebs mainta, Prome Minister Mike Eman tabata di bishita na Mabon. Prome Minister ta haya importante cu durante su gobernacion e por keda den contacto cu pueblo pa scucha e preocupacion, sugerencia y ideanan di e habitantenan pa nan bario, pero tambe Aruba en general. Y esaki ta loke habitantenan di Mabon a aprecia. Prome Minister a bolbe bek su oficina cu hopi informacion pa por haci su trabou mucho mas miho y cu e locual el a papia cu e habitantenan den mente.

Prome Minister ta bishita barionan hunto cu funcionarionan di varios departamentonan cu ta duna servicionan importante y cu e habitantenan mester di nan, manera Serlimar, GKMB (Gele Koorts en Muskieten Bestrijding) y Bus di Salud. “Nos a sinti hopi entusiasmo y aprecio pa e diferente departamentonan cu ta compaña nos den Accion di Bario,” Eman a duna di conoce na final di e bishita.

Den e bishita na Mabon e mandatario a haya hopi comentario positivo pa presencia di e Bus di Salud bou guia di dr. Luis Arango. Yegando asina cerca di cas ta un sistema efectivo pa haci control di por ehempel presion, sucu, colesterol. Hopi aspecto di salud di un persona por wordo evalua durante un control di Bus di salud. Si tin algo cu no ta mustra bon, e pashent ta wordo conseha pa pasa cerca su dokter di cas inmediatamente y ta haya un papel pa bay cu ne splicando locual a wordo constata. Esaki, e mandatario a splica, ta masha importante den e cuido di prome linea, unda Gobierno ta hiba esaki mas cerca den e bario cerca e habitantenan. Principalmente si mira cu hopi di e cliente di Bus di Salud ta personanan grandi cu no por sali facilmente mucho leu for di nan cas.

No ta unicamente Bus di Salud tabata presente na Mabon, tambe por a mira funcionarionan di departamentonan cu ta importante den e servicio cu ta brinda na e comunidad. Ta papia aki por ehempel di GKMB cu ta hiba un control rigoroso di e barionan cu Prome Minister di bishita, adicional na e trabou cu normalmente nan ta haci. Tambe e funcionarionan di GKMB ta yuda conscientisa ciudadanonan riba e peligro di criaderonan cu por causa entre otro Dengue of Chikingunya.

Prome Minister a recorda e situacion alarmante cu Chinkingunya a causa na Corsou caminda miles y miles di persona a keda infecta. Na Aruba GKMB a hiba un lucha pisa pa conscientisa e ciudadanonan y ta mirando bon resultado, cu e situacion di e dos malesanan aki bou di control. 

Arthur Leañez y Efraim Lampe di GKMB tabata e funcionarionan cu a compaña Prome Minister Eman y su Team BoBario. Ambos a bisa cu Mabon durante e control di ayera y di algun siman prome a demostra di ta hopi limpi. Casi no a topa cu casonan cu por conduci na criaderonan di e sangura cu ta causa Dengue of Chinkingunya. “Aki banda ta mustra limpi y semper e casnan di pueblo ta tene cuenta cu e criaderonan,” Leañez a duna di conoce.

Leañez a agrega tambe cu algun siman atras nan a cuminsa trata e mangrovenan cu tin na Zeewijk, haciendo uzo di cierto kimiconan special cu ta mata e larva pa e no bira sangura y causa problemanan di salud.

Expresionnan haci den e articulo aki no necesariamente ta refleha opinion di ArenaPoliti.co