"Maneho di nos enseñansa ta organisa den e forma cu e tabata antes na Hulanda. Aya nan  a cambia esaki hopi aña caba. Na Hulanda e gobierno ta fiha un maneho, parlamento ta aprob'e y control'e y scolnan ta ehecu'e. A haci esaki netamente pasobra e forma bieuw cu nos tin ainda, tabata stroba un maneho efectivo di gobierno pa trece cambio pa miho den enseñansa. Ayanan tambe nan a bisa cu si gobierno tin cu paga pa tur cos den enseñansa ya ta wordo poni responsabel pa resultado di enseñansa, anto gobierno mester tin cu haya mas autoridad pa dirigi rumbo di enseñansa. Aki na Aruba ainda nos ta pega cu e forma bieuw cu nos a hereda di Hulanda. E fraccion di AVP ta cla y dispuesto pa trece cambio den esaki na Aruba." Asina Marlon Sneek, presidente di comision di enseñansa di Parlamento di Aruba y miembro di e fraccion di AVP a bisa awe diabierna atardi den parlamento. Ela bisa esaki den e reunion di tratamento di e presupuesto pa aña 2015-2016 di e Fondo di Enseñansa. Den contesta riba pregunta di miembronan di Parlamento, minister a splica e limitacionnan cu tin den maneho pa cambio den enseñansa, pa motibo cu pa mucho tempo e autoridad pa tuma desicion ta asina parti serca diferente instancia, cu ta haci un maneho efectivo manera na Hulanda  imposibel.

CAMBIO
Marlon Sneek a enfatisa cu pa mucho aña caba ta papia di e problemanan den enseñansa y di e falta di consenso entre tur esnan cu tin autoridad pa loke ta sosode den enseñansa, sin cu por trece cambionan desea. Na final ta e hobennan di Aruba ta esnan cu ta sufri di e fayonan conoci den enseñansa. Marlon Sneek: "Nos no kier sigui papia sin yega na solucion. Si na Hulanda mes nan a trece cambionan structural, den e forma di fiha un maneho pa mehora enseñansa y ehecut'e den forma efectivo, anto nos tambe mester haci'e. E reparticion di responsabilidad bieuw cu nos a hereda di Hulanda no ta funciona. Nan mes a pon'e un banda. Anto pakico nos si ta keda pega cun'e y sigui sin por trece cambio cu ta necesario den enseñansa. E cambionan cu nos kier trece lo mester sosode cu respet pa tur e opinionnan cu tin den comunidad pa cu enseñansa. E no lo exclui niun hende of grupo, pero e lo duna pueblo pa medio di su gobierno, mas di bisa den con ta dirigi nos enseñansa. Awor aki gobierno den nomber di pueblo y cu placa di pueblo, ta paga pa casi tur cos den enseñansa, pero e tin cu accepta loke otro instancianan ta dicidi. Mescos cu nos a reforma nos sistema di pensioen y a sigur'e pa hopi decada, mescos cu ta reforma nos finansa publico, salubridad, economia y turismo cu exito, asina nos kier reforma nos enseñansa pa cada mucha tin mas exito na scol."  Asina Marlon Sneek a sigui bisa. Obviamente e frustracion cu tin cu nos enseñansa no por continua. Tur hende tin cu responsabilisa y no keda sinta riba stoelnan bieuw cu no ta sirbi nos comunidad mas. Den e siman y lunanan cu ta bin lo tin hopi mas ta bay sosode riba e tema aki. 

Expresionnan haci den e articulo aki no necesariamente ta refleha opinion di ArenaPoliti.co