NEW YORK – E Prome Ministernan di Aruba, Corsou y Sint Maarten  a tuma un solo punto di bista riba e asina yama voorlichting di Raad van State referente na instruccionnan duna door di Conseho di Minister di Reino na e Gobernadornan den e parti Caribense di Reino. Pa medio di un carta nan a pone e Presidente di Conseho di Reino na haltura di e punto di bista aki.

E paisnan ta comparti e conclusion di Raad van State cu no por otorga competencianan nobo na Gobernador como organo di Reino pa medio di un instruccion di Conseho di Minister di Reino. Tampoco por descuida obligacion y limitacionnan legal di organonan di e paisnan pa medio di un instruccion, ni tampoco por mete den nan competencianan. Raad van State no ta laga espacio pa duda cu e instruccionnan di Conseho di Minister di Reino na Gobernador di Aruba y di Sint Maarten aña pasa, pa loke ta aprobacion di presupuesto, respectivamente asuntonan di integridad, tabata enpugna cu Statuut y por lo tanto ilegal.

E gobiernonan di e tres paisnan ta considera di gran importancia cu tur organo di Reino ta tene nan mes estrictamente na e rekisitonan di Statuut. Si den futuro sosode cu Gobernadornan un bes mas ta haya instruccion cu ta surpasa nan competencianan constitucional, e tres paisnan lo no coopera cu nan ehecucion, esaki conforme e voorlichting di Raad van State

E gobiernonan di Aruba, Corsou y Sint Maarten lo sigui brinda nan Gobernadornan tur sosten necesario pa nan por sigui ehecuta nan tareanan conforme Statuut. Nan ta spera mescos di Conseho di Minister di Reino den futuro. E paisnan ta convenci cu un cooperacion basa riba respet mutuo y confianza entre e cuatro paisnan ta sigui di ta di gran balor agrega pa Reino. Tur esaki mester tuma lugar dentro di e cuadronan di Statuut.

Den nan reaccion na Presidente di Conseho di Minister di Reino – por cierto traha den cede di Nacionan Uni - e tres Prome Ministernan a conmemora cu tabata existi dudanan grandi cerca Nacionan Uni tempo cu a introduci Statuut di e boluntad sincero di Hulanda pa decolonisa Antiyas Hulandes di e tempo ey y Surnam. Mira den e luz ey nan ta lamenta un bes mas cu un mayoria den Conseho di Minister di Reino no a trata cu cuidou y diligencia e decision tuma encuanto e instruccionnan.

Expresionnan haci den e articulo aki no necesariamente ta refleha opinion di ArenaPoliti.co