Aruba a hunga rol importante den busca avenida pa yega na e logro aki 

ORANJESTAD-Diamars den dia te den oranan laat di anochi a tuma lugar e Conferencia di Reino. Presente tabata Prome Ministernan di Corsou Asjes, di Sint Maarten Gumbs, di Aruba Eman y representando Hulanda Minister di Asuntonan Interno y Relacionnan di Reino Plasterk. E reunion a bay bon te ora a yega na tratamento di e asina yama ‘geschillenregeling’ cu a keda acorda entre Parlamentonan di Reino durante reunion di IPKO luna pasa na Hulanda. E postura di Hulanda tabata completamente otro na loke a keda acorda den reunion di IKPO, pero finalmente, despues di hopi discusion, a logra yega na un acuerdo riba e tema importante aki.

Despues di e conferencia Prome Minister Eman a bisa cu mirando cu tabatin un acuerdo caba entre e Parlamentonan durante IPKO luna pasa, a sali di e punto di bista cu e tema aki lo tabata facil pa trata. “Sinembargo por a nota cu tabatin diferencia di opinion entre Hulanda y e paisnan Caribense di Reino. Asina mes nos a busca e parti di dialogo riba loke nos ta di acuerdo cu ne y no bay riba e puntonan riba cual nos tabata diferencia di otro pa asina por a haya un apertura pa yega na un geschillenregeling. Di parti di Aruba nos ta kere cu cada pais continuamente mester keda inverti den e relacionnan den Reino. Hustamento si nos mester mustra unda e balor adicional di Reino ta cu nos por tin un Reino cu ta funciona den un forma mas constructivo”. Pa loke ta e geschillenregeling cu a bira e punto fuerte di discusion durante e conferencia, Eman a bisa cu ya na e conferencia anterior Hulanda no a mira e necesidad pa un geschillenregeling pa e islanan. “Den e declaracion final di e conferencia aki a reconoce cu mester bin un geschillenregeling. Dentro di tres luna e gobiernonan lo sinta hunto pa mira con ta bay duna contenido na e areglo aki. Pa nos ta importante pa den e areglo aki haci uzo di e puntonan cu e parlamentonan a acorda durante reunion di IPKO luna pasa”. Fraccion di AVP a haci un trabou intensivo y consistente pa basta aña caba pa loke ta e tema aki, entregando mocionnan creando asina e base politico pa por realisa e areglo importante aki.

Eman: “E balor di un geschillenregeling ta pa na momento cu gobierno di Reino tuma un decision manera cu Aruba, Corsou y Sint Maarten a experencia cu aanwijzingen, caminda e discusion ta keda si Conseho di Reino por intermedia of mete su mes den asuntonan cu na nos parecer ta algo pa e paisnan mes maneha, bo mester tin un instancia na unda acudi y cu den un forma obhetivo y imparcial dicidi si e deciscion tuma ta corecto of no”. Eman a mira bek riba e situacion di aña pasa cu presupeusto di Aruba y su welga di hamber pa motibo cu no tabatin un avenida unda acudi y pidi pa wak den forma imparcial si loke a tuma lugar door di e pais mas poderoso den Reino tabata esun corecto. “E incidente di aña pasa a pone mas cla ainda pa henter Reino cu no por tin circumstancianan unda tin sentimentonan profundo afecta y cu no tabatin un caminda unda acudi. Esnan na Hulanda cu inicialmente no tabata mucho na fabor di un geschillenregeling a realisa cu despues di e patstelling aki cu mester bin haci algo. Durante e conferencia aki riba e geschillenregeling, Hulanda a bin cu un postura diferente cu loke a acorda den IPKO. Esaki a sorprende nos, pero na final toch a logra e reconocimento cu e mester bin y a base di e cuadranan cu a wordo fiha den e reunion entre e parlamentonan.” Finalmente toch un logro importante na unda Aruba a hunga un rol esencial den busca e avenida pa yega na e logro aki.

Eman a bisa cu e contribucion di Aruba durante e conferencia a wordo hopi mes aprecia. “Mi por a sinti esey di mi coleganan di Corsou, Sint Maarten y Hulanda. Aruba semper ta keda un protagonista importante den pone un tono positivo, apesar di tur locual nos a pasa aden na momentonan cu nos tabatin diferencianan di opinion. Nos ta kere den Reino Hulandes y pa nos ta importante pa busca e caminda cu ta duna e otro partnernan e confiansa pa nos sigui inverti den un relacion fuerte cu Reino.”

Expresionnan haci den e articulo aki no necesariamente ta refleha opinion di ArenaPoliti.co