ORANJESTAD- Minister Plasterk di Relacionnan di Reino ta na Aruba pa un dia riba un bishita di trabou. Despues di a reuni cu Prome Minister Eman y Minister Bermudez, Plasterk a bishita MariniersKazerne pa un lunch cu comandante Ten Hove y despues a reuni cu Jessy Ras di Formacion Social na unda hunto cu Prome Minister Eman y su delegacion haya un splicacion con e programa di hobennan aki ta bayendo. Despues di a papia cu e hobennan Minister Plasterk a duna un entrevista cortico den cual a toca algun punto di interes.

Formacion Social
Un programa cu a keda institui na aña 2011 cu ayudo e tempo ey di Ministerio di Defensa di Hulanda y Ministerio di Asuntonan Interior. E ayudo finaciero di Hulanda tabhata pa un tempo limita. Gobierno di Aruba a continua cu e programa cu ta dunando masha bon resultado. Algun luna pasa e di ocho grupo di hoben a drenta Kazerne pa cuminsa cu e prome lunanan di training pa despues bay scol, core stage y cu e meta final pa haya un trabou. Minister Plasterk a haya un demostracion chikito di e hobennan. Hunto cu Minister President Eman el a papia cu nan despues tanto den grupo como individual. El a encurasha nan pa caba cu e programa cu ta bon pa nan mes.

Minister Plasterk a bisa cu e ta haya tremendo con Aruba a sigui cu e programa Formacion Social y a hasta amplia esaki. “Mi ta masha impresiona cu e programa cu ta yuda hobennan pa haya e bon caminda bek den bida. Algun di nan ta hobennan cu tabatin problema cu diciplina y cu awor ta mira cu cos por bay di otro manera tambe. Mi a papia cu un hoben cu a bisa mi cu e tabatin amigonan robez, cu el  a desvia di e caminda corecto y cu e no kier un bida asina mas. Formacion Social ta duna e hoben aki e oportunidad pa cambia su bida, pa gara e chens aki y esey ta algo cu mi tin hopi respet p’e. Cu Minister President semper tey ora di entrega di e baretnan blou ta un señal importante pa e hobennan.”

Geschillencommissie
Cambiando di tema Minister Plasterk riba e pregunta con ta para cu e ‘geschillencommissie’ pa Aruba, el a bisa cu no solamente Aruba, pero den henter Reino mester bin cu un comision asina. “Mi a papia riba e tema aki cu Minister President Eman awemainta. E tabatin aprecio pa e hecho cu mi ta avansando riba e tereno aki. Eman a bisa mi cu e lo discuti e asunto aki pa haya sosten di Staten entre otro.” Mirando e hecho cu apesar di loke a sali afo di e peticion haci na Raad van State y cu ainda no a bin un acuerdo pa un geschillencommssie, Plasterk a contesta cu e commisie aki ta bay bin, pasobra e ta para den Statuut, pero te ainda no sa kico exactamente mester bin den dje ya cu ta hunto mester trata na yega na un consensus. Plasterk a bisa cu aki ta trata di algo cu mester ta cuidadoso cu ne, pero cu ya ta durando casi 5 aña caba y cu enberdad e tempo a yega pa haci algo. Esey ta tambe un di e motibonan di su presencia na Aruba. “E areglo cu podise ta bin awor no ta uno definitivo, pero si uno cu nos por cuminsa traha cu ne. Mayan mi ta bay Corsou  na unda mi lo trece e punto aki dilanti y pronto tambe na Sint Maarten. Nos ta trahando duro pa yega na e areglo.”

Venezuela
Pa loke ta e preocupacion grandi cu ta reina na Aruba pa e situacion tenso na Venezuela cu su consecuencianan pa e islanan di Reino a puntra Minister Plasterk si e no ta kere no cu lo mester introduci visum pa Venezuela. “Laga mi cuminsa na bisa cu mi ta mira cu e problema ta uno serio y creciente. Un problema den e pais mas grandi cu ta mas cerca di e frontera di Reino Hulandes cu ta Venezuela. Na Den Haag no semper e situacionnan aki ta wordo mira cu un wowo skerpi, asina ta cu mi lo hiba tur loke mi a tende aki bek Den Haag cu e mensahe cu e ta un problema cu ta birando mas grandi cada dia. Loke mi ta compronde tambe ta cu di un banda kier sigui atrae e turista cu placa di Venzuela y Colombia, pero di otro banda kier evita tambe cu ta bin hende aki cu tin otro intencionnan, entre otro pa score placa cash. Mi tin comprension pa e situacion y lo discuti esaki cu mi colega di Asuntonan Exterior.”

Expresionnan haci den e articulo aki no necesariamente ta refleha opinion di ArenaPoliti.co