Minister Oduber na Hulanda concretisando inversionnan den cultura di Aruba 

Durante su biahe di trabou, Minister Otmar Oduber a topa cu Sr. Joost Vrieler coordinador di Mondriaan Fonds. Mondriaan Fonds no ta desconoci pa nos isla mirando cu nan ta cofinanciado di e proyecto di Paardenbaai. A probecha e ocasion pa duna un update di e proyecto aki mirando cu e ta den su etapa final. Sr. Vrieler tabata entusiasma y orguyoso di por a forma parti di Paardenbaai mirando cu conhuntamente por a realisa e proyecto poniendo Aruba riba un nivel hopi halto, pa locual ta e mapa di cultura y specificamente arte accesibel pa publico. Esaki ta un aspecto importante unda ta crea un espacio pa motiva y incentiva hende pa educa nan mes riba e tereno cultural yegando na bienestar social y economico.

Den e proyecto di Paardenbaai e historia di Aruba pues e esencia di e nomber di e sitio, a bin dilanti hopi fuerte demostrando cu via arte bo por educa no solamente nos comunidad pero e turistanan tambe cu ta bin di afo. Nos bishitantenan ta siña den un forma diferente e storia di nos isla. Esaki ta netamente e tipo di proyectonan cu Mondriaan Fonds ta orguyoso di forma parti di dje y ta cla pa sigui sostene mas proyectonan asina. Es mas dor di por a demostra e exito di e proyecto, e representante di Mondriaan Fonds a puntra mesora si tin intencion pa mas di e proyectonan tipo arte den espacio publico. Minister Oduber a confirma e planificacion di esaki pa continua cu e tipo di proyectonan aki. E ta ideal den e vision y combinacion di Cultura y Turismo.

Despues di e reunion aki por menciona cu Aruba por sigui conta cu e sosten di Mondriaan Fonds. Inversion den cultura ta promove crecemento no solamente den e aspecto di cultural pero tambe den e aspecto social y economico di un pais. Esaki a keda aplaudi pa Mondriaan Fonds representa pa Joost Vrieller, unda Aruba ta keda reconoci pa su esfuersonan di trece cultura y arte riba e nivel necesario treciendo conscientisacion y crecemento.

Expresionnan haci den e articulo aki no necesariamente ta refleha opinion di ArenaPoliti.co