Prome cu e presupuesto a yega parlamento. Prome cu CAFT y Raad van Advies duna nan conseho, ya MEP a saca conclusion cu e presupuesto no ta bon. E "opinion" di e partido MEP cu e presupuesto di 2016 lo ta irealistico no ta basa riba un analysis, pero e ta un opinion riba e concepto di e presupuesto cu a yega Parlamento luna pasa. Cu e conseho di CAFT y Raad van Advies minister di finansa ainda tin tur espacio pa haci bon uso di e analysisnan cu e expertonan aki duna y cambia e presupuesto unda e ta haya ta necesario. E critica di MEP cu e minister a calcula entradanan di gobierno den 2016 mucho halto, ta basa riba e mal experiencia bou di gobierno di MEP caminda en berdad a surgi un situacion masha complica cu expertonan di Departamento di Finansa mester a bisa e tempo ey cu e minister lo a calcula e entradanan mucho halto pa por hustifica gastonan mucho halto. Esey no ta e caso na 2015. E entradanan mas halto den 2016 no ta basa riba belastingnan nobo of door di niun medida. Nan ta basa riba e crecemento economico, e inversionnan cu lo tuma luga na 2016 y e entradanan mas halto na belasting cu e lider di MEP ta bisa hende pa no paga. Rene Herde: "Ta ora nos haya e presupuesto cu tur e consehonan di expertonan nos lo por wak kico en berdad ta poni den e presupuesto. Anto ainda tin cu warda pa durante di e aña 2016 wak si en berdad gobierno ta haya e entradanan cu e ta bisa di lo bay haya. Ta ora bo ehecuta e presupuesto bo ta haya sa si e ta realistico. Anto si tin cualkier aspecto cu tin di ahusta, den e presupuesto, ta haci esaki durante di e aña. Ta asina ta traha cu e presupuesto durante di e aña. E critica di MEP na e momento aki ta hopi prematuro y basa riba mal experiencia cu nan propio gobernacion. E ta un prehuicio politico."

CAFT
Otro cos cu ta remarcabel ta cu e partido MEP mes a pidi gobierno Hulandes pa impone CFT y laga CFT analysa tur cos. Tambe e NVnan di gobierno. Ora di trata e ley di CAFT e partido MEP a vota contra loke nan mes a pidi p'e. Anto awor nan kier usa Caft pa haya cos pa critica. MEP no ta demostra nada otro cu oportunismo politico o sea loke ta zona bon ta bisa!
CAFT semper lo ta conservativo. CAFT semper lo kier aumenta entrada y baha gasto lihe. Pero AVP a bisa semper cu niun cambio den maneho tin mag di afecta economia, mercado laboral of forsa di compra di pueblo. Ta pesey AVP a enfatisa cu e caminda pa baha deficitnan den presupuesto ta uno gradual: un proceso di cambionan chikito cu no ta afecta negativamente e crecemento  economico y creasion di trabou, ni e forsa di compra. Esey nos ta haciendo y esey nos lo sigui haci. Un desaroyo balansa y responsabel. Si mester tuma mas tempo of cambia un of otro aspecto di e maneho, anto nos lo haci esey. Pero no a costo di loke mester ta e meta principal. Esta e bienestar y progreso di henter pueblo.

NEGATIVO
E desaroyo di Aruba desde 2009 riba tur tereno ta enorme. Anto esey ta sosode den un tempo cu henter mundo y henter nos region di Caribe y America Latino ta pasando den desaroyonan masha dificil. Pero hasta bou e condicionnan dificil aki for di 2009 Aruba a logra sali for di e abismo economico, social y laboral desastroso cu e tabata aden bou di gobierno di MEP. E tono negativo di e partido MEP nunca a cambia. Nunca ta parse di lo cambia.

Expresionnan haci den e articulo aki no necesariamente ta refleha opinion di ArenaPoliti.co