CRITERIONAN FINAL PA PRESUPUESTO 2015 

Aunke fraccion di AVP ta bay wak e cifranan di presupuesto 2015 di serca y evalua nan den e cuadro financiero di e plan di "Presupuesto Balansa" y di e "Plan di presupuesto di mas aña 2014-2017", na final ta e metanan cu kier logra y e cumplimento cu esakinan, ta conta mas pisa. Rene Herde' a bisa esey splicando cu den pasado aki na Aruba y den otro paisnan di Reino, a  busca forma pa percura pa e cifranan di presupuesto ta bon y realistico. Pero a lubida cu ta goberna pa mehora nos pais y condicionnan di bida di henter pueblo. Ta  masha masha importante pa e cifranan ta realistico y cu nan ta cuadra cu loke a wordo palabra. Pasobra si e cifranan di presupuesto no ta cuadra, ta bira dificil pa realisa e maneho. Pesey pa e fraccion di AVP ta masha importante pa e cifranan ta bon. Pero mas importante ainda ta cua ta e metanan cu kier logra cu e presupuesto y e maneho su tras.

CIFRA vs META
Den pasado bou gobierno di MEP nos a wak con a purba haci magia cu cifraran. A percura pa e cifranan ta super bunita (2008) net prome cu eleccion. Pero e bunita cifranan ey no a conduci na realisa nada bon pa pueblo! Al contrario. Ta gañamento cu cos ta stabiel y cu economia ta bayendo bon so pueblo a tende. E realidad tabata cu Aruba ya tabata den un crisis y gobierno tabata pensa riba su mes so. E resultado tabata un caida den economia di 15% den dos aña y desempleo cu a subi te na 12%. Den otro paisnan di Reino nos ta wak cu (bou supervision di CFT) ta logra cifranan bunita, pero desempleo ta keda halto, inversionnan no ta sosode, economia no ta crece y intrankilidad social ta crece. Pesey pa AVP loke gobierno fiha como meta y realisa tambe, ta mas importante. Pueblo mester sinti e efecto positivo di e maneho di gobierno. Rene Herde': "E metanan cu gobierno a fiha for di 2009 y a realisa den apenas 4 aña ta loke nos mester sigui haci. Esey ta exigi hopi trabou, creatividad y escogencianan bon pensa y balansa di gobierno y parlamento. E metanan cu nos a fiha di pone economia crece den un forma sostenibel, crea cuponan di trabou nobo, reduci gastonan di operacion di aparato di gobierno y sigura un desaroyo economico, financiero y social sostenibel, ta loke nos ta bay sigura atrobe. Kier men cu pa nos no ta cifra bunita sin resultado pa pueblo, pero cifranan cu ta cuadro cu realidad y realisacion di e metanan cu nos a fiha ta conta. Pa nos tur dos mester tey pa e maneho ta bon."

Expresionnan haci den e articulo aki no necesariamente ta refleha opinion di ArenaPoliti.co