Parlamentario Chris Romero (MEP):

Ta danki na Mike Eman su "Circo Politico" cu awe Aruba ta den un caos financiero sin igual

Den e ultimo dianan aki nos tabata testigo di e tiramento di palabra cu tin andando entre Minister President y Minister di Finansas, tocante e introduccion di e reforma fiscal cu lo mester drenta na vigor dia 1 di januari 2016.

De facto, e situacion aki a wordo categorisa pa Minister Bermudez como un "circo politico", y na su defensa el a enfatisa cu e mes no ta un politico como cu nunca el a yega di postula su mes politicamente. Y como un bon circo, esaki ta e parti chistoso den henter e situacion aki, pasobra Angel Bermudez ta bisa di no ta un politico sin realisa cu fungiendo e posicion di Minister ta hasi cu automaticamente e ta un politico, kier of no!

Henter e asunto di e reforma fiscal, y e manera con Gobierno ta tres'e dilanti den medionan di comunicacion, realmente ta un acto digno di un circo, pasobra e ta un payasada total.

Mientras cu Minister Bermudez ta declara publicamente, y na varios ocasion, cu e reformanan fiscal ta cla y lo drenta na vigor dia 1 di januari 2016, Minister Eman ta contradeci e ponencia aki argumentando cu lo mester consulta cu dialogo social prome, y cu pa 1 di januari 2016 no lo keda cla.

Un situacion cu por compara facilmente cu e chasconan cu e payasonan di un circo ta presenta pa nan publico hari. Payasada completo ta loke e dos Ministernan aki ta hasiendo publicamente pa purba scapa cara di Minister Mike Eman y su mal gobernacion.

E no ta un secreto cu Dialogo Social ta simplemente un otro acto di Mike Eman su "circo politico", pa asina purba gaña hende cu su Gobierno tin consideracion absoluto cu e necesidadnan y anhelonan di nos pueblo.

Pero nos tur sa cu ora Gobierno sinta na mesa cu e gremionan y sindicatonan concerni, ta simplemente pa informa nan di e decisionnan tuma den ministerraad, y cu lo keda ehecuta sin importa kiko e gremionan lo tin di bisa of ta opina.

Ta ken Minister President ta purba gaña? Manera ta su custumber, e ta hasiendo un show mediatico pa asina purba keda como e heroe, lagando su Minister di finansas como e "boe-man" atrobe.

Como cu Angel Bermudez a yama Gobierno di Mike Eman publicamente como un "circo politico", e ora ta duna espacio pa nos puntra ta ki funccion sr. Eman ta fungi den su circo?

Lo ta cu sr. Eman ta e payaso di su circo, of e "fortune teller"?

Y ki funcion sr. Bermudez ta fungi den e "circo politico" di Mike Eman? E mago cu ta bende su publico un ilushon of un truco, pa asina gaña wowo di hende?

Algo cu nos como pueblo por ta sigur aworaki ta, cu Mike Eman y su Gobierno no tin seriedad algun pa goberna nos pais. Ta danki na tur e payasadanan cu nan a hasi y ta keda hasi pa gasta placa di pueblo, cu awe Aruba ta hinca den un caos financiero cu nunca nos a yega di experiencia como pueblo.

E show di circo cu Mike Eman y Angel Bermudez ta hungando ta uno masha fasil pa decifra. Nos tur sa cu Minister Bermudez a acepta di drenta arena politico pa asina fungi como e "boe-man" di Mike Eman su Gobierno, lagando espacio pa Minister President keda hunga su comedia di heroe di su votadornan.

Pero na final di dia e resultado ta keda igual; Angel Bermudez den su trabou di Minister di finansas tin e obligacion di castiga pueblo cu medida, pasobra e tin cu cumpli cu e exigencianan di e ley di CAFT. Y Minister President tin cu keda keto y laga tur medida pasa pasobra e no mag bay contra Hulanda su exigencianan.

Esaki ta e "Bon Trabou" di e "Circo Politico" yama Gabinete Mike Eman I y II!