Durante Accion di Bario 

ORANJESTAD – Durante e bishita cu Prome Minister Mike Eman a haci ayera na Madiki, e punto di salida tabata Anglo Kleuterschool. Den cada Accion di Bario, e mandatario ta gusta bishita un instancia of grupo pa asina haya un bista con nan ta funciona den e comunidad. Den e caso di scol preparatorio, Premier Eman ta consciente cu e ta un punto central y importante den Madiki.

Den pasado Gabinete Mike Eman a duna scol su debido atencion den forma di renobacion. Asina mes semper tin algo cu ta necesario. Actualmente e scol ta hayando molester di palomba riba e dak di e gymzaal. A inspecciona y cuminsa pensa riba solucion. Ademas di esey, a tuma nota cu e scol tin mester di un parkeerplaats y e tereno parti patras lo ta ideal pa esaki cu un entrada nobo pa e scol. Asina muchanan ta mas safe ora di yega scol y bay cas. Prome Minister ta wak e ultimo aki hopi factibel y a priminti di papia cu Minister di Infrastructura Benny Sevinger pa coordina e plan y trabou.

Prome Minister Eman mes por a experiencia e calor den klas y a menciona cu airco a keda demostra di tin un efecto positivo riba e calidad di atencion, educacion y ambiente na scol. El a informa docente y studiantenan cu Gobierno ta trahando duro riba proyecto di Panelnan Solar cu ta bay baha e costo di energia di scolnan y habri fondonan cu por bay pa compra y instalacion di airconan cu ta hopi necesario.

Sin duda por bisa cu e bishita na Anglo Keluterschool tabata uno sumamente agradabel. Adulto y mucha a ricibi Prome Minister Mike Eman cu hopi cariño. Di su banda, e mandatario tambe a tuma nota di e dedicacion y amor cu cual e docentenan ta haci nan trabou y a gradici y felicita nan pa esaki. Pa motibo di estudio, cabesante di e scol no por tabata presente na e bishita, pero na su luga docentenan Rianne Korsen y Xiovanne ‘Poppy’ Caciano a haci e recorido cune den tur klas. “Muchanan a gosa, canta y aplaudi pa Minister,” Juffrouw Korsen a expresa. Por a ripara cu, te hasta ora cu el a bay, muchanan tabata para na bentanan pa bisa ayo!

Expresionnan haci den e articulo aki no necesariamente ta refleha opinion di ArenaPoliti.co