Enconeccion cu tratamento di dos ley den Parlamento, esta e ley cu ta regarda calidad di Cuido di Salud y e ley di BIG, e comision parlamentario encarga cu Asuntonan Social y Salud a reuni cu un cantidad di stakeholders ariba tereno di Salubridad. A reuni cu Asociasion di dokternan di cas (HAVA), Asociasion di Specialistanan Arubano (VMSA), mediconan cu ta den servicio di Hospital (AVSD), Hospital dr. Horacio Oduber (HOH), Instituto Medico San Nicolaas (IMSAN), Algemene Ziektekosten Verzekering (AZV), Asociacion di Boticarionan, skol EPI, Organisacion di Enfermeronan Arubano (ODEA), Bond di Enfermeronan di Hospital (ABV), Stichting Algemene Bejaardenzorg Aruba (SABA), Witgele Kruis, IMSAN, Asociasion di Dentistanan Arubano, Asociacion di hygienistanan Bucal, Patienten Adviesraad y Mediconan cu a studia den region. Dos di e instancianan invita no por tabata presente. A resulta dificil pa haya contacto cu cierto organisacion mientras tin organisacion cu riba propio iniciativa a tuma contacto pa por duna nan opinion. Segun Wyatt-Ras ta trese padilanti cu a trata di haya mayoria na mesa pa skucha nan opinion. Dor cu e tempo ta corto tin instancia a skohe pa nan manda pregunta despues di e reunion, no mas tarda cu diabierna cu a pasa cu a ser prolonga pa dialuna. Esaki ta pa facilita e parlamentarionan cu informacion pa nan na nan turno por haci nan preguntanan na Minister encarga cu Salud, cual preguntanan lo mester a ser entrega dialuna.  Wyatt-Ras y fraccion di AVP ta conciente di e hecho cu e tempo ta limita, sinembargo aunke cu Parlamento lo entrega su preguntanan dialuna y esakinan lo wordo manda pa Minister por contesta nan, e posibilidad ta keda habri pa organisacionnan por keda manda nan remarcanan y preguntanan pa e comision, na sra. Wyatt-Ras, Griffie of via di otro Parlamentarionan. Wyatt-Ras ta gradici tur e organsacionnan y profesionalnan pa nan confiansa y cooperacion pa acudi na reunionnan ariba termino corto. No tin fecha ainda pa tratamento di e ley den  Reunion Publico. Tin cu bisa cu diferente punto importante a ser tresi padilanti dor di e diferente organisacionnan cu a ser skucha. Tur ta di acuerdo cu otro cu e leynan ta necesario pa mehora calidad di cuido di salud. Un inspeccion cu por traha independiente y por tene supervision ta urgente. E cliente ta central y mester regula kehonan cu e cliente por haya contesta ariba esakinan. Den ley ta regla cu 6 siman despues di entrega keho e cliente mester tende algo. E 6 siman por ser prolonga cu 4 siman, pero despues di esaki e cliente mester tende kico a pasa. Institui un Instituto di calidad cu tin cu yega na criterianan, normanan etc. pa garantisa bon cuido di salud y lo coopera cu otro institutonan di calidad den exterior. Lo registra profesionalnan den Salud segun nan diploma y cierto criterianan y normanan. Aki lo yega na proteha e diferente “beroepsbeoefenaren” y alavez lo tin mas control di con e funcionamento ta. Banda di conocemento ta importante tambe con ta traha (vakbekwaamheid). Mayoria di esnan presente a considera cu den articulo 2 di BIG falta diferente profesionalismo pa menciona. P.e. mondhygienisten, medisch verpleegkundige, psychologo y psychotherapeuten. Un punto di discucion ta en especial e grupo di mediconan studia den region. Segun cu nan ta trese padilanti ora nan caba di studia ta un caminda di cruz pa nan por ser registra den BIG y pa haya un trabou. Nan tin cu paga pa nan bolbe bai de exterior pa caba cu nan studio. Na e otro banda ta ser tresi padilanti cu nan studio den region ta un studio basico y cu nan tin cu specialisa ta pesey tin cu bai den exterior. Netamente pa asuntonan asina ta importante, segun e parlamentario pa bin reglamentacion. Actualmente ta evalua cada cas individual y den futuro e instituto di calidad lo por salvaguardia e tin standaard y criterianan fiho.Manera cu minister Alex Schwengle den su presentacion na Parlamento tocante di e leynan a trese padilanti, despues cu pasa e leynan lo mester implementa nan y esaki lo tuma su tempo mas o menos 2 anja promer cu e ley, inspector di  Salubridad y Instituto di Calidad lo ta in place. Pa cu ehecucion di diferente articulo den e ley lo mester traha landsbesluiten y minister tambe lo mester sinta na mesa cu diferente stakeholders. Wyatt-Ras kier notifica na e organisacionnan cu no a ser skucha ainda por tuma contacto cu su persona como presidente di e comision of cu Griffier. Wyatt-Ras ta spera cu miembronan di Parlamento di tur fraccion awor lo por  prepara debidamente pa e debate den Parlamento ora ta trate e leynan aki cu lo ta den bienestar di e hende esta e cliente.  

Expresionnan haci den e articulo aki no necesariamente ta refleha opinion di ArenaPoliti.co