Diamars Parlamento di Aruba den reunion di dos comision, esta di Finanzas y Economia bao presidencia di ing. Chris Dammers y e comision di Salud, bao presidencia di drs. Mervin Wyatt-Ras a haya presentacion di Director di AZV, drs. Anco Ringeling y funcionario di impuesto, sra. Jelen Velasquez encuanto e ley di “Health tax”.

Sra. Velasquez a splica cu Healthtax di 1% lo ta basa ariba Bedrijfs Omzetten. E suma lo bai den un fondo die costonan di malesa y lo bai pa AZV. E vak den tempo lo ta cada luna di calendar te cu dia 15 di e luna.

Sr. Ringeling a splica cu desde comienso di AZV a inicia cu un contribucion di pais Aruba den e fondo cu tabata menos cu presupuesta y den curso di anja e contribucion aki a baha di 60 % pa 30 %. Pues a baha cu 50%. Den curso di anja gobiernonan a hisa premie y AZV tambe a corta vet. Awor ainda AZV ta haciendo ehercicionan pa sigui baha gasto, manera entre otro dor di regula entrada di esnan cu ta den servicio dor di manpowerplanning, baha gastonan di e praktijken, baha gasto di medicina dor di receta medicina generico, baha pago di lumpsum y negosha directo cu Hospitalnan den exterior na cual ta manda patientnan.

Dor di e asina yama “Healthtax” AZV por sigui cu su trabounan en especial en bista di desaroyonan den mundo di salud unda cu tin cu inverti pa logra calidad mas halto. Contrario na antes, awor Aruba ta conta cu un Mama Poli unda patientnan di cancer di pecho ta ser atendi na un forma diligente y profesional, tin un centro di dyalise na IMSAN y wonden poli cu ta haci cu patientnan ta hopi mas satisfecho. Tin  bon cuido di opthalmologia y tambe a haci e promer operacionnan di cardiologia di intervencion dor di cual patientnan lo por ser atendi aki mes na Aruba. Ademas si nos kier tin turismo medico ta necesario pa haci cierto inversionnan den nos Hospital y nos infrastructura medico.

E hecho cu nos tin cu paga mas pa hisa calidad ta un inversion pa nos futuro. E decision pa un Healthtax  ser tuma den consulta cu gremionan cu a skohe pa esaki envez di hisa e prima. Un decision social unda cu nos tin cu yuda otro pa asina tur hende ora cu bira malo por yega un dokter y haya e tratamento cu nos tin derecho ariba  dje, segun Wyatt-Ras. E hecho cu gobierno ta introduciendo leynan di Salud, lo registra profesionalnan riba tereno di salud y lo reglamenta cu kehonan di patientnan lo mester wordo skucha y contesta den un cantidad di tempo defini sigur lo duna cada patient y tambe profesionalan ariba tereno di cuido mas proteccion.

En bista cu nos poblacion ta biba mas largo cu tin su impacto ariba salubridad y cu malesanan chronico ta halto y lo sigui aumenta dor di nos estilo di bida y di come, nos gastonan di salubridad lo sigui subi. Ta den man di nos tambe como comunidad di cuminsa tuma nos responsabilidad pa atende cu nos salud y asina haci posibel cu gastona por ser domina y ta keda na Parlamento tambe pa sigui vigila e proceso aki pa garantisa nos ciudadanonan sin distinccion un mihor cuido di salud. Por bisa cu e parlamentarionan presente a haci nan preguntan y expresa nan preocupacion y a ricibi contesta na e momento ey. Pronto por spera cu e ley lo ser trata den Parlamento y ta spera cu tur parlamentario por carga nan responsabilidad pa sali na vanguardia di nos pueblo en general. 

Expresionnan haci den e articulo aki no necesariamente ta refleha opinion di ArenaPoliti.co