Cuminsando e aña aki Gabinete Mike Eman II ta trahando duro riba e proyecto di Traimerdia pa Scol Secundario. Minister di Asunto General, Mike Eman y Minister di Enseñansa, Michelle Hooyboer-Winklaar ta haciendo esaki den cooperacion estrecho cu otro. Cu un Traimerdia pa Scol Secundario ta cumpli cu e necesidad di hopi hoben y nan mayornan.

Pa e hobennan, e Traimerdia ta un bon luga pa comparti cu otro persona di nan mesun edad y participa hunto den actividadnan agradabel. Pa mayornan, e Traimerdia ta un luga sigur pa nan yiunan ta parti atardi. Pa medio di e proyecto aki, ta yena un bashi grandi.

Durante hopi encuentro Minister Mike Eman y Michelle Hooyboer Winklaar, a haya hopi pregunta riba un centro di cuido pa hobennan. Tambe den Dialogo Social, durante tratamento di e tema di Siguridad, a trece traimerdia dilanti como sugerencia. Awo e idea tin contenido y ta den pleno ehecucion.

Den e Traimerdia kier ofrece un programa atractivo pa e hobennan na nan mesun scol. Esaki ta posibel danki na e cooperacion di organisacionnan comunitario y ciudadanonan, bou guia profesional. Un parti di e programa ta, por ehempel, un almuerzo hunto. Banda di esey, ta laga espacio pa movecion, wega, musica y teatro, entre otro.

E Traimerdia pa Scol Secundario ta destina pa hobennan studiante di EPB, MAVO, HAVO Y VWO. Esun prome na beurt tabata EPB Pariba. For di 10 di november ultimo, e traimerdia pa hobennan di klas 1 y 2 ta na EPB San Nicolas ta un realidad.

Cu hopi entusiasmo, e prome grupo di e Traimerdia a inicia su prome siman dialuna 10 di november. Esaki a inclui un workshop di traha film. Rond di 20 hoben a traha den ekipo y a hinca den otro nan mesun idea pa un film. Nan a graba y edita esaki bou supervision di e conocido artista Ryan Oduber. Di e manera aki a produci cuater, asina yama, ‘short films.’ E muchanan a traha tur dia riba esaki, bou guia di Tanja Fraai y Mike Ho-Sam-Sooi, entre 2’or y 5’or di atardi.

E topico di e filmnan a varia entre San Nicolas y su nomber di ‘Chocolcate City,’ e tentacion di forma parti di un gang te, na e atractivo di, Aruba Dushi Tera. Esnan interesa den wak e producto final di curso, por wak e short film riba e pagina di Facebook di NSOARUBA.

Diabierna 14 di november, tur e studiantenan a ricibi un certificado. Na final di e encuentro, tabatin un sorpresa pa e oficina di Traimerdia. Boolchands a haci entrega di un bunita beamer cu e proyecto di Traimerdia por haci hopi bon uzo di dje. E workshop di cine tabata posibel danki na sosten di TNO Aruba, Divi Resorts, Total Service N.V., Boolchands y Balashi.

Expresionnan haci den e articulo aki no necesariamente ta refleha opinion di ArenaPoliti.co