Den un entrevista hasi cu lider di fraccion di MEP parlamentario Evelyn Wever-Croes a elabora riba e impacto di decisionan riba nos pensionadonan cu lo wordo tuma door Gabinete Eman. Parlamentario Wever-Croes a declara lo siguiente:" nos pensionadonan lo wordo sacrifica cu e cambio di ley cual dentro di poco lo wordo trata door di parlamento. Den e ley ta papia di un bezuiniging di 11 miyon florin den e duurtetoeslag di e pensionadonan. Cada pensionado cu mira su payslip mester realisa cu esaki lo no ta aplicabel mas. Ademas di esaki e bashi premie y gelijkbedrag tambe lo bai wordo kita for di e pensionadonan y ambtenaarnan cu despues lo baha cu pensioen tambe. 

 

Segun gobierno nan no tin derecho riba esaki. Es mas den e ley nan ta hasta bisa cu por hues numa si no ta di acuerdo pasobra OPA lo no gana toch. E pregunta e ora ey ta . Dicon e la wordo paga tur e añanan anterior anto? Den e ley ta pidi pa e pensionadonan ta mas solidario cu nos hobennan. Gobierno ta sinti cu aruba lo ta patras di e ley siendo cu OPA mes no a wordo involucra pa delibera over e cambionan. Hecho ta cu e ley aki bo lo ta pushando nos pensionadonan den pobresa. Gobierno mester a cuminsa na reduci e ministernan y corta den e cantidad di 700 coordinadornan. Tin biaha ta parce ministernan ta mas preocupa cu nan biahenan enbes di tin atencion pa loke ta di importancia pa nos comunidad y den e caso aki ta nos grandinan. 

 

Nos ta contra e forma dictatorial cu gobierno kier pasa e ley aki y e forma con gobierno kier masacra nos grandinan. Loke Prome minister a priminti na nos grandinan ta un mentira pasobra si acaso e logra aloca mes un suma pa gelijkbedrag ta ultimo aña cu e lo tuma lugar pasobra e lo wordo aboli. Nos grandinan no merece di a wordo trata asina aki y nos di oposicion ta lamenta esaki, parlamentario Wever-Croes a termina.