"E crisis mundial a causa hopi daño na entrada di hende rond di mundo. Dependiendo di kico gobiernonan a haci despues, bo ta wak si a logra sigura entrada di e pensionadonan. Na Merca hopi trahador a perde nan pensioen por completo y a keda sin entrada. Nada a wordo haci pa nan. Na Hulanda a corta den e suma cu trahadornan y nan famia ta haya pa nan pensioen tur luna. Kico a sosode na Aruba? E dos fondonan di pensioen tabata na caminda pa bay bancarota bou grobierno di MEP. Esey lo a laga 20 mil pensionado sin niun entrada. A salba e fondonan di pensioen y a sigura tur e 20 mil pensionadonan na pensioen pa hopi aña den futuro. Anto a haci esaki sin corta niun momento den e pensioen cu nan ta haya tur luna, manera si a sosode na Hulanda y na hopi otro pais. Banda di esey e pensionadonan na Aruba a haya compensacion pa aumentonan di costo di bida. Nan a haya e reparatietoeslag, un suma extra riba nan den pensioen pa cubri gastonan. E diferencia entre loke otro paisnan a haci y loke gobierno di AVP a haci, ta splica pakico aki na Aruba si a logra salba e fondo sin corta den e pensioen di e pensionado."

FORTIFICA E FONDONAN
Hopi pais a haya nan ta reorganisa e fondonan di pensioen pa scapanan di bay bancarota. Na Hulanda a aumenta e edad di pensioen, a corta den e pensioen mensual y a introduci diferente limitacion pa yega na pensioen. Awor aki tin hasta sugerencia pa limita e pensioen ora hende bay biba pafo di Hulanda. Na Corsow a scohe pa hisa e edad di pensioen den un tiro di 60 pa 65 aña. Netamente pa salba e fondo. Na Aruba gobierno di AVP a haci diferente cambio den e structura di e fondonan di pensioen, a inverti miyonnan di florin den e fondo di pensioen di empleadonan publico y maestronan di scol, y a hisa e edad di pensioen gradualmente di 60 pa 65 aña den un periodo di 10 aña. Tur esaki sin corta den e pensioen di e pensionadonan.

OPOSICION
Oposicion a vota contra di e cambionan den e fondonan di pensioen cu a salba e fondonan. Nan a hasta yama esakinan medida y a critica gobierno di AVP pa a salba e fondonan di pensioen. Kico oposicion tabata tin como miho plan? NADA!!!

HYPOCRESIA
Loke MEP a kere cu e por a sconde ta e conseho di e lider di MEP pa cambia e sistema di pensioen di behez. Ela conseha su gobierno di MEP pa hisa e edad di pensioen mas lihe, den menos tempo te na 65 aña. Pero e plan di gobierno di AVP pa hisa e edad gradualmente den un periodo di 10 aña ela yama "medida". Asina ela wordo gara ta gaña atrobe. Ta e forma di dobbel cara aki ta loke a duna MEP y su lidernan e fama di ta INCONFIABEL!

Expresionnan haci den e articulo aki no necesariamente ta refleha opinion di ArenaPoliti.co