Minister Otmar Oduber a realiza un bishita na ICOM (International Council of Museums) cu ta e entidad internacional cu ta representa museonan rond mundo. E mandatario a reuni cu Professor dr. Anne-Catherine Robert-Hauglustaine, Directora General. E reunion aki tabata uno hopi interesante unda cu a intercambia hopi informacion riba mundo di museo.
Membrecia na ICOM ta refleha un calidad halto di insitutonan mirando cu nan ta tene nan mes na algun criteria internacional cu ICOM ta stipula.
Minister Oduber a duna un splicacion di e pasonan cu a tuma caba cu Fundacion Museo Arubano, cual ta un fundacion cu ta acapara diferente museo y ta crea un sinergia den e sector aki como tambe eficiencia.
E mandatario a indica cu intencion ta pa crea un sector profesional cu ta traha hunto y ta colabora, tambe cu ta trata fondonan publico hopi mas eficiente y ta haci mas facil pa inversionistanan priva pa por enfoca riba un solo organizacion den e sector.
Minister di Cultura tambe a bisa cu lo cuminsa cu e pasonan pa haci di e instituto di museo miembro di ICOM. Sra, Robert-Hauglustaine tabata sumamente contento di por a tende esaki, mientras cu a mustra hopi interes pa scucha tur e pasonan cu Aruba a tuma, ta tumando y ta bay tuma. El a indica cu e tin hopi experiencia cu museonan mas chikito tambe y cu esey no mester ta un factor cu ta limita e membrecia den e organizacion y cu el lo asisti Aruba den e proceso aki.
Un otro punto cu Minister Otmar Oduber a atende cu Directora General di ICOM ta e capacitacion y recapacitacion di nos hendenan local. Compara cu paisnan mas grandi manera Francia, Belgica of Hulanda, nos experticio no ta mes grandi, pero e ambicion ta pa yega na e nivelnan aki unda tin diferente experto cu ta specializa den e sector di museo. ICOM tambe ta brinda e oportunidad pa colaboracion strategico den e sector aki. A menciona cu tin posibilidad, mirando cu el a yega di tuma lugar cu otro nacionnan chikito, pa crea un tayer extenso na unda personanan di ICOM lo bin Aruba pa asina asisti e profesionalnan den museo, pero tambe hendenan cu tin interes den crece den e sector aki.
Tambe tin e posibilidad di asistencia tecnico di expertonan cu lo por bin Aruba y lo por cana hunto cu e personal di organizacionnan pa wak con e informacion cu a wordo duna den e tayernan por wordo implementa.
Conclusion di e reunion aki ta cu tin hopi interes pa inverti den Aruba, no solamente den forma di recapacitacion, pero tambe den forma di pone Aruba riba mapa como nucleo general riba diferente tereno na unda cu cultura tambe ta forma parti di dje. Esaki por wordo bisa pasobra Sra, Robert-Hauglustaine a indica cu tin hopi interes pa desaroya mas museo y mas conocemento di e sector aki den Caribe. Ta mirando e posibilidad pa wak Aruba como un di e ‘trekkernan’ den esaki...Aruba como un nucleo, Aruba como e plataforma regional. A keda sumamente interesa pa sigui cu e colaboracion potencial. Di banda di Aruba tin pasonan claro y firme cu por wordo tuma y lo wordo tuma pa logra esaki.

Expresionnan haci den e articulo aki no necesariamente ta refleha opinion di ArenaPoliti.co