Tawata di spera cu Gabinete Eman lo ta laat un biaha mas cu entrega di presupuesto 2016. Esaki a para bira un custumber y hasta crea e impreshon cu na un manera premedita ta laga te na ultimo simannan di anja pa trata un ley asina importante manera esun di presupuesto. Loke si Gabinete Eman a entrega tawata algun "papel" cu cifranan preliminario di presupuesto pa aña 2016. E instancia cu ta supervisa finansas CAFT a publica su rapport relaciona cu presupuesto (preliminar) 2016 di pais Aruba. Den e articulo aki nos lo recapitula den corto loke a wordo constata.

Ta asina cu Gabinete Eman na aña 2013 a presenta un plan jama balanced budget accoord cu ta consisti di un trajecto pa sanea finansas publico di nos pais y incluyendo 26 medida reparti den esnan pa genera entrada y e otronan ta pa baha gasto. E trajecto aki tin normanan maximo di deficit cual por cierto a wordo incorpora den e ley di supervision financiero. Den principio e deficit stipula pa 2016 no mag pasa 2.0% segun e ley. Pero riba e detayenan nos lo amplia den e siguiente alineanan.

Un di e remarcanan cu a hala atencion ta e hecho cu e entrada pronostica den presupuesto 2016 ta irealisticamente halto mientras cu pe banda di gastonan tin casi nada di reduccion.
Ora di hasi comparacion entre cifranan di presupuesto y e cifranan di proyeccionan multi-annual cu Gabinete Eman mes a compila a constata cu esunan di e presupuesto a surpasa su limitenan. Specificamente e parti gastonan a resulta 1336 miyon siendo cu e lo mester ta 1305 miyon. Pa loke ta entrada segun e presupuesto preliminario 2016 lo tin un aumento di 74 miyon florin na entrada di belasting comparando cu 2015. Esaki ta debi na aumento di belasting directo, belasting indirecto y tambe entradanan cu no ta di belasting. Gabinete Eman a laga sa cu debi na e retraso den e ley "reforma fiscal" lo continua cu e cobransa intensivo di belasting cu lo pone cu tin un aumento di 82 miyon adicional.
Specificamente riba e punto aki CAFT a indica cu entradanan aki ta irealistico door cu Gabinete Eman no a substancia suficente con lo yega na e entradanan di belasting aki.

Adicionalmente e ta importante pa remarca cu segun e presupuesto preliminario lo tin un crecemento economico di 3.8%. E colegio di supervision a señala cu un pronostico mas recien y adapta lo ta na su lugar. Obviamente esaki kiermeen cu tin duda den e cifra di crecemento aki y cu e ta mucho halto. Pesei CAFT lo aplica un crecemento di 3.5% cual consecuentemente lo tin su efecto y nifica un entrada total di 1197 miyon pa pais Aruba.

Kiko esaki ta nifica e ora ey? A base di e datonan aki (cifranan preliminar) lo tin un deficit financiero di 148 miyon florin cual lo ta ekivalente na 2.9% di nos producto domestico bruto. Cu esaki bo por conclui cu ta surpasa e norma acorda di 2.0% y un biaha mas Gabinete Eman ta viola acuerdo y ley!

Expresionnan haci den e articulo aki no necesariamente ta refleha opinion di ArenaPoliti.co