Mervin Wyatt-Ras ta informa cu den e simannan cu ta sigui Parlamento banda di ta ocupa cu nos presupuesto, tambe lo ta ocupa cu leynan cu ta regarda nos salud. Ya caba comienso di siman ta entregando preguntanan pa loke ta trata e ley di Calidad di Cuido di Salud y tocante e ley di profesionnan den cuido (BIG), esaki despues cu a skucha un cantidad di 17 instancia y minister di salud. Pa medio di ley lo garantisa cu cuido na patient cu awor lo ser yama cliente lo mehora y cu tin supervision pa medio di Inspeccion di Salud y lo mehora e forma cu ta procesa y contesta keho di patientnan, controlando alavez pa medio di registracion den BIG y control, e forma con cuido ta ser duna na e patient. Mervin Wyatt-Ras ta haya esaki di importancia pero alavez e ta haya importante cu nos como patient tambe tin deber. E deber aki ta pa cuida nos curpa y preveni malesa. Esaki sigur ta mas facil pa bisa cu pa haci, sinembargo e hecho cu gastonan di nos Salubridad publico y AZV ta sigui crece ta pone un presion no solamente ariba esnan cu ta sinti malo pero tambe ariba henter comunidad aunke cu bo ta cuida bo curpa. Pues ta rekeri esfuerzo hunto pa asina pasa pa un estilo di bida mas saludabel cu menos cuminda vet, menos humo di sigaria, menos uzo di alcohol y mas movecion. Wyatt-Ras diabierna hunto cu coleganan di fraccion a bishita IMSAN unda por a haya chekeo di suku y por a haya un desayuno saludabel, esaki en coneccion cu dia internacional di diabetis. Sinembargo por nota cu aunke tabatin hopi hende por tabatin mas en comparacion cu ora tin un fiesta of un conhunto cu ta toca for di exterior. Tog ta keda cu ora instancianan, aunke gratis ta ofrese chekeo pa nos hendenan, esaki ainda no ta biba serca nos hendenan. Wyatt-Ras ta considera diabetis banda di presion halto malesanan cu nos tin cu tuma na serio. Gobierno tin diferente incentiva y lo fortifica e cuido den promer instancia dor di dokternan di cas, esta e asina yama “eerste lijnszorg” pa patientnan por haya cuido directo y evita cu nan ta bai serca un specialista pa casona cu un dokter di cas na un forma diligente por trata. E casonan di tanto diabetis como presion halto ta aumentando mientras nos poblacion tambe ta bibando na edad mas halto. E presion ariba nos gastonan di AZV ta pone cu gobierno tin cu busca medionan pa cubri gastonan y asina nos lo bai trata tambe pronto den Parlamento e ley di “Healthtax”. Ta keda cu si cu nos mes como patient no haci algo pronto pa cuida nos salud e gastonan lo sigui crece y cada dia salubridad publico lo bira mas y mas caro y nos lo tin cu paga mas.

Expresionnan haci den e articulo aki no necesariamente ta refleha opinion di ArenaPoliti.co