6 Aña di mal gobernacion ta prueba suficiente di e incapacidad di Mike Eman su Gobierno 

Tabata algun dia atras cu nos por a mira Minister Eman declarando publicamente cu e medidanan fiscal no lo por keda implementa sin pasa dialogo social prome, y cu esey no lo keda cla pa e fecha cu Minister Bermudez a stipula. Pero, di otro banda nos a mira tambe con Minister Bermudez a declara cu pa 1 di januari 2016 e reformanan fiscal lo drenta na vigor. Minister Bermudez tambe a enfatisa cu aunke e sa cu e ta forma parti di un circo politico, e tin un trabou pa cumpli cun'e y esey mes e ta bay hasiendo.
Mas cla sr. Bermudez no por tabata ta! Y manera nan ta bisa na spaño "a buen entendedor pocas palabras"; AVP ta un circo politico di cual Minister President ta e actor principal.

Despues di a crea un circo mediatico y politico entre Minister President y Minister di Finansa, finalmente Minister Bermudez a informa Parlamento di e desaster di medidanan cu lo keda implementa riba nos pueblo. Durante e reunion publico di diaranson, sr. Angel Bermudez a bisa den Parlamento cu e ABB di 7% lo drenta na vigor for di 1 di januari 2016, contradiciendo tur declaracion duna pa su Minister Presidente.

Awe, despues di 2 aña di atraso, nos a mira finalmente e motibonan real pakiko Minister Eman a opta pa bay un welga di hamber aña pasa, y asina purba busca lastima den su seguidornan.
Awe nos a comproba cu Hulanda tabatin motibonan suficiente pa pone un KB riba e Gobierno di Mike Eman. Ta danki na e mal gastamento di fondo di pueblo di parti di Mike Eman y consorcio, cu awe Aruba ta bou curatela financiero.

E engaño di campaña yama "bon trabou" bisti cu e bachi di "ainda falta", awe a enfrenta realidad. E realidad amargo di wak nos finansas publico den un decadencia sin precedente.
E hipocrecia di e integrantenan di Gabinete Mike Eman. E gañamento y manipulacion di realidad constante cu ta reina den partido AVP, ta loke ta treciendo un frustracion creciente den nos comunidad. Pero lastimente nos por ta testigo diariamente cu loke menos ta importa partido AVP ta e sufrimento di nos pueblo.

Nos mocion di desconfiansa contra e mal maneho financiero di Gobierno di Mike Eman, ta simplemente vociferando e dolor cu ta reina den nos pueblo. Ta danki na e mal gastamento di placa y prioridad robes di e Gobierno aki, cu awe nos pueblo no tin sosiego den su gastonan. Y awor cu tur e medidanan nobo cu tin na caminda, nos como pueblo lo sigi sufri mas ainda. Y, ni maske partido AVP keda purba tira culpa riba Gobiernonan di MEP, 6 aña di mal gobernacion ta suficiente pa demostra e incapacidad di Mike Eman y su Gobierno pa goberna nos isla.

Expresionnan haci den e articulo aki no necesariamente ta refleha opinion di ArenaPoliti.co