Despues di bishita di bario aña pasa di Prome Minister Eman 

ORANJESTAD – E prome stop di Prome Minister Mike Eman durante su bishita diahuebs ultimo na Noord Cura Cabay y Brazil tabata na St. Michael School. Sr. Eman a wordo ricibi door di juffrouw Valerie Janga di St. Michael School, kende a duna e mandatario un recorido di e scol. Topiconan di e combersacion cu Prome Minister tabata e cambionan cu a tuma luga na e scol y algun di e deseonan cu e scol tin.

Loke a hala atencion inmediato ta e capa di asfalt nobo cu e speelplaats nobo di St. Michael School a haya. Esaki a wordo poni durante vakantie di october. Na momento cu e muchanan a bolbe scol esaki tabata un sorpresa agradabel. E capa anterior tabata hopi deteriora y tabatin solamente piedra chikito cual tabata un forma un peliger pa e muchanan ora di hunga. “Awo e muchanan ta super contento, nos tur ta contento,” e cabesante a duna di conoce.

E scol aki danki na algun sponsor manera Radisson y algun mayor a logra pone airco den tur e klasnan di St. Michael School. Esaki ta permiti tanto docente como e studiantenan concentra mas riba dunamento di les y siñamento. Sra. Janga a combersa largamento cu Prome Minister Eman y asina a yega na e palabracion cu lo bay pinta algun linea riba e speelplaats unda cu e muchanan por hunga p.e. mini-futbol, trefbal, etc,. Di e forma aki ta uza e espacio den un forma mas optimal posibel.

El a recorda e bishita anterior di Prome Minister Eman y Accion di bario, e aña escolar cu a pasa, no por a pinta e weganan pasobra no tabatin asfalt. E tempo ey di parti di gobierno a busca recursonan pa pone e capa nobo di asfalt pa e muchanan por disfruta mas di e espacio disponibel.  “Nos ta masha contento cu e cooperacion cu nos ta ricibiendo di e bishita di Accion di Bario di Prome Minister Eman,” el a duna di conoce.

Expresionnan haci den e articulo aki no necesariamente ta refleha opinion di ArenaPoliti.co