ORANJESTAD - Den un ambiente festivo a inaugura oficialmente edificio di MFA-Noord. Un cantidad grandi di habitantenan di e bario di Noord, mescos tambe di otro partinan di Aruba a yega na e edificio cu ta disena y construi den e forma mas sostenibel posibel pa presencia su apertura. Henter e anochi tabata formidabel. Himno di Aruba canta pa Jack Tromp, a duna contenido special na e anochi bunita y vibrante. Frendsel Giel di SOGA a papia di e convivencia cu antes tabata reina den barionan na Aruba y sigur den Noord unda el a nace. “Esaki ta loke e edificio aki ta para p’e. Pa hende topa cu otro, combersa riba cosnan di tur dia y na mes momento haci uzo di e servicionan cu ta wordo brinda.” Su director Richard Tromp a bisa di ta satisfecho con cosnan a bay te awor. “Na luna di juni nos a cuminsa traha caba aki y awe nos ta celebra apertura di MFA Noord.”. Minister Sevinger a papia di un vision cu a bira realidad. “Nos tur ta aki para dilanti un edificio bunita y moderno unda tur hende por bin pa haci uzo di loke e ta brinda, danki na un vision. Un vision di e actual gobierno y su Prome Minister Mike Eman.” Despues di presentacion di bailenan cultural pa un Damita Cultural Jouemy Hernandez y e grupo ‘Rosea Cultural’ Prome Minister Eman a hiba palabra. Cu un bos yena di emocion el a conta con a cuminsa traha e centro multifunctional MFA Noord. Un centro cu ya den corto tempo a duna muestra di su motibo di existencia. Despues di a yama danki na tur cu a traha cu alma y cuerpo riba ehecucion di MFA Noord, Prome Minister Eman a revela number di e edificio. “E lugar aki ta bay yama na un persona masha keri y stima den bario di Noord. E ta bay yama ‘Cas di Titi’ na honor di Sra. Titi Tromp. Un awacero di aplauso a sigui. A corta cinta y tur hende por a drenta pa mira con bunita e lugar ta. Un pabien grandi na pueblo di Noord y Aruba henter.

Expresionnan haci den e articulo aki no necesariamente ta refleha opinion di ArenaPoliti.co