Cuanto biaha un persona por ripiti e mesun fabula prome un persona lag’e realisa cu ta cos loco e ta papia? Ken no ta corda Al Gore cu diripiente a descubri e tema di medio ambiente. Mientrastanto e ‘hype’ rond di dje a caba, pasobra tur experto tabata sa cu e no tin ni un nocion di locual e tabata papia. Cu el’a gana hopi placa cu su reciclahe di e mesun fabula bieu, esey no ta importante. Pasobra algun politico a descubri un ‘baca lechera’ den e medio ambiente bou e pretexto: ‘WE CARE’. Nos companianan di utilidad tambe a paga Sr. Gore casi mey miyon florin pa scucha e mesun cantaleta bieu di algun minuut. Pero di esey, ningun hende ta kik pasobra nan por a sali den un potret cu un ‘celebrity’ manera Al Gore.

Den algun dia, despues cu parlamento a coopera, hopi naturalesa a wordo destrui sin cu e procedura corecto a wordo sigui. Sin cu tabata tin un Milieu Effect Rapportage (MER). Sin cu a informa pueblo. Despues cu partido ABO a mustra cu no tin un MER di e proyecto, cu e area di mangel tin un balor ecologico halto y cu e minister di Infrastructura a mal informa (gaña) parlamento, gobierno a core bay busca un compania cu ningun hende a yega di tende di dje pa bin cu un PIDA MER. Un PIDA MER pa susha wowo di pueblo. E gobierno ‘Green’ a ’BULLDOZE’ tur e naturalesa y por poco tambe tur e mangelnan, pa un ‘CAMINDA SCUR’ miyonario.

Punto ta cu e gobierno ‘Green’ a sigui cu su ‘modus operandi’ di ‘BULLDOZE’ tur cos na nan antoho, pasobra ta nan tin e mayoria den parlamento. Hasta cosnan ilegal ta wordo legalisa despues den parlamento. Esaki no ta DEMOCRACIA, pero ‘BULLYING’ y DICTADURA.

Awor e siman aki un delegacion grandi di e gobierno ‘Green’ (t)a sali bay Parijs pa asisti na un reunion internacional ambiental (COP21/CMP21). Pregunta ta pa haci kico? Pa saca mas potret cu ‘celebrities’ pa despues bin conta pueblo mas fabula cu ta si e no tabata pa nan, Nacion Uni no lo a descubri e tema di ‘Sostenibilidad’ (‘Nos ta contento pa mira awe cu United Nations a adopta e tema di sostenibilidad’, Bon Dia Aruba, 29 september 2015). E gobierno ‘Green’ a destrui hopi naturalesa sin cu tabata tin un MER pa un ‘CAMINDA SCUR’. Awor nan kier bay hunga e SANTO DEFENSOR di ‘GREEN’ na un conferencia internacional di medio ambiente. Please!

Hasta un mucha di 5 aña sa cu un ‘CAMINDA SCUR’ no ta atribui nada positivo na e medio ambiente, pero si na e calentamiento global y produccion di polucion. Pues mientrastanto e gobierno ‘Green’ lo ta na Parijs reciclando fabulanan pa nan propio beneficio, e naturalesa lo sigui wordo destrui aki na Aruba pa un ‘CAMINDA SCUR’. Esaki si bo ta yama SIN ESCRUPULOS, SIN BERGUENSA!

Medio ambiente ta wordo viola tur dia y di tur manera aki na Aruba, pero hopi hende no ta ni worry. Pasobra e no ta importante y cu e no ta nan asunto. Violacion ta algo condenabel y repudiabel unda cu bo bay. Cu aki na Aruba tin hende cu a bisa cu nan a wordo ‘verkracht’, pa despues pa sinta den scochi di nan ‘verkrachter’, esey no kiermen cu diripiente el’a bira legal y normal pa ‘verkracht’ un pueblo y su naturalesa.

E ta bon pa recorda, cu ainda tin hende drechi aki na Aruba cu ta condena violacion total. Cu tin hende cu ta gusta brasa y sunchi nan violado, ta bisa hopi di e persona. Un cos ta sigur, naturalesa no tin un bos pa grita, pero esey no kiermen cu el’a pidi pa wordo viola of cu e ta gusta wordo viola. Ban para e violacion brutal di nos naturalesa door di un gobierno ‘Green’ cu su proyecto ‘CAMINDA SCUR’.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co