Nos a tuma nota den medio di comunicacion cu 30% di e usuarionan di WEB tin cuenta atrasa. Esaki segun e informacion recibi di WEB ta 12000 usuario di WEB cu tin problema pa paga nan recibo di awa. Segun WEB a informa, e weekend aki tur esnan cu tin pago atrasa lo haya un notificacion di esaki y nan lo haya 48 ora, dos dia, pa haci e pago. Esun cu no paga, su meter lo wordo corta y lo keda sin awa. E noticia aki ta uno hopi preocupante y ta indica cu tin un necesidad grandi ta reina na nos Pais na unda cu ya caba hopi famia no ta conta cu recurso suficiente pa por paga pa cosnan basico manera awa. Mas tristo ta cu e Pueblo ta wordo castiga, pero esnan cu a comete e crimen di hedging contra e Pueblo aki, mes ta cana rond sin castigo.

Esnan cu no por paga a tripifica
Den pasado WEB a yega di informa cu tur luna tin un grupo di 4000 usuario cu no ta paga nan cuenta di awa mesora y kende ta paga mas laat den luna of ta sera un areglo di pago. Pero e noticia di awe cu tin 12000 usuario cu cuenta atrasa ta mustra cu esnan cu no por paga nan cuenta a triplifica. Esaki ta un indicacion cu costo di bida a bira haltisimo na Aruba cu e consecuencia cu pa un grupo grandi, placa no ta yega ni pa paga e servicio basico di awa. Anto ta poco dia pasa Minister Eman tabata gaba cu e ta haci su best pa no tin pobresa na nos Pais y ata WEB ta sali mustra un realidad amargo dilanti di cuanto pobresa ta reina na nos Pais na man di Gabinete Eman.

Si no a hedge Pueblo lo a beneficia di rebaho di prijs
Locual cu Minister Eman no ta papia di dje ta e crimen cu a wordo haci contra e Pueblo aki door di e hedging cu a wordo haci na WEB. Si no a hedge e prijs di bari di fuel oil cu WEB ta usa, awe Pueblo lo por a beneficia grandemente di un rebaho di prijs a consecuencia cu e bari di fuel su prijs a baha drasticamente. Pero ta Minister Eman su vision 2020 y Minister De Meza su idea pa tene tarifa stabiel a pone cu awe Pueblo ta paga e prijs pa awa na balor di $90 pa bari, siendo cu e prijs awe ta rond di $40. Esaki ta un crimen contra e Pueblo aki. Anto mas tristo ta cu esnan cu mester wordo investiga y castiga pa e crimen di hedging aki ta cana rond sin castigo, siendo cu e Pueblo ta wordo castiga cu prijsnan halto te na e extremo cu 12000 usuario no por paga nan cuenta di awa.

Mester investigacion
Nos di Fraccion di MEP na varios ocacion a pidi pa bin un investigacion profundo riba e asunto di hedging. No solamente na WEB, pero Utilities y Ministernan Eman y De Meza tambe mester wordo investiga den e asunto di hedging aki. Banda di esaki mester investiga tambe e proyecto di Ecogas den WEB, ya cu pavia di e proyecto aki tambe WEB a bay den cora, cual na su turno tambe ta perhudica e Pueblo di Aruba. Pesey un investigacion ta na su lugar, pasobra bo no por castiga Pueblo y esnan cu a haci malo mes laga nan cana rond sin castigo.

27 november 2015

Expresionnan haci den e articulo aki no necesariamente ta refleha opinion di ArenaPoliti.co