Gabinete Eman ta buscando tur manera pa hinca e asunto di hedging na WEB den ‘doofpot.’ Cueste lo que cueste, e gobierno aki kier evita cu investigacion por wordo haci pa expone e abuso di marca mayor cu nan a haci cu e Pueblo di Aruba. E asunto di hedging aki ta un otro abuso di Gabinete Eman cu mester wordo investiga y condena.

Rapport di investigacion incompleto
Te ainda no tin un rapport cu ta contene un investigacion profundo y completo riba kiko a bay fout den e asunto di hedging na Web cu a causa cu awe Pueblo no por mira un rebaho den nan recibo di coriente, siendo cu na mundo henter prijs di crudo a baha barbaramente. Minister De Meza a informa Parlamento dia 5 di mei 2015, cu ela manda pidi mas informacion pa saca afor si WEB a wordo bon conseha. Pero e no a splica e resultado y no a bisa si ta e hedging team di WEB, e hunta di supervicion, e management, e compania Caise & Co, Utilities of su mesun persona como minister encarga ta responsabel pa e fout grandi haci cu hedging.

Mocion pa ARA investiga a wordo nenga
Nos di Fraccion di MEP a urgi e mayoria di Parlamento pa laga Algemene Rekenkamer Aruba (ARA) investiga e asunto di hedging specialmente na unda ta toca e rol di ministernan y Utilities como shareholder di WEB den e asunto di hedging. Pero e Fraccion di AVP a nenga pa ARA investiga.

WEB a sigi hedge sin debido investigacion
For di e carta di Minister De Meza na Parlamento ta bira bisto cu asina mes cu no tin un investigacion pa saca afor kiko a bay robes cu hedging, toch WEB a sigi hedge basa riba e mesun strategia cu a pone nan faya y perhudica Pueblo. E mandatario a indica cu te cu 2017 tin contract di hedging riba mesa pa tene prijs di coriente stabiel y no pa baha prijs di coriente pa Pueblo. Ta te despues di 2017 lo bay evalua si ta cambia e strategia pa hedge. Remarcabel ta cu tur esaki ta wordo dicidi y haci sin debido investigacion.

Un abuso cu mester wordo investiga y condena
E asunto di hedging aki a perhudica full nos Pais. E rapport di PWC aunke incompleto ta mustra cu hopi cos a bay fout den e asunto di hedging aki y no por ta asina cu WEB ta keda hedge manera nada no a pasa. Pa evita cu Pueblo ta sigi wordo perhudica, mester bin un paro na e abuso aki di Gabinete Eman. E asunto di hedging mester wordo investiga door di instancianan concerni y esnan responsabel mester wordo condena pa e abuso aki contra nos Pueblo.

18 mei 2015

Expresionnan haci den e articulo aki no necesariamente ta refleha opinion di ArenaPoliti.co