E ta un realidad y un berguensa cu e Fraccion di AVP despues di a bolbe scucha Minister De Meza admiti cu hedging na WEB a perhudica e Pueblo di Aruba, no ta boga pa un investigacion profundo wordo haci na bienestar di nos Pueblo. Cu e actitud aki e Fraccion di AVP ta bolbe demostra cu nan ta presenta na trabou djies pa percura pa Minister Eman por keda na poder y no pa traha na beneficio di Pueblo. Nan falta di interes pa laga investiga kiko ta pasando na WEB, ta muestra cu Fraccion di AVP kier tapa e crimen di hedging contra nos Pueblo.

Mitar investigacion
E ta un crimen ora cu mundialmente prijs di crudo ta baha y ta yega te 30 dollar y nos Pueblo mester paga pa produccion di awa y coriente na WEB na un balor di 90 dollar. Pueblo no por conta cu e alivio di bahada di prijs ya cu na WEB a haci uso di contractnan di hedging den cual nan a cumpra 95% di e uso di fuel oil pa aña 2015 y 2016 na un pijs fiho di 90 dollar pa bari di crudo. Na comienso di 2015, Gabinete Eman a laga Price Waterhouse Coopers traha un rapport pa investiga ta kiko por a bay robes y for di e rapport aki a bin hopi punto di preocupacion dilanti. Pero remarcabel ta cu ta mitar investigacion a tuma lugar, ya cu e rol di Utilities y di Ministernan Eman y De Meza a keda full afor.

Fraccion di AVP no kier pa ARA investiga
E eror cometi cu e contractnan di hedging na WEB ta perhudica full e Pueblo di Aruba y pesey un investigacion profundo pa Pueblo haya sa kiko a bay robes y kendenan mester wordo responsabilisa pa e danio aki ta na su lugar. Nos di Fraccion di MEP a yega di entrega un mocion pa pidi Algemene Rekenkamer Aruba (ARA) pa haci e investigacion aki pa Parlamento di Aruba. Pero lamentablemente e Fraccion di AVP a bay contra e mocion aki haciendo uso di e excusa cu Gabinete Eman mes lo bay haci un investigacion. Un hilaridad ya cu dificilmente Ministernan Eman y De Meza lo laga investiga nan mesun rol y esun di Utilities den e toma di decicion den e contractnan di hedging.

Tapa crimen pa keda na poder
Hedging, banda di e desaster financiero di nos finanzas publico, ta e crimen di mas grandi cu Gabinete Eman a haci contra e Pueblo di Aruba. E solo hecho cu e Fraccion di AVP no ta bay di acuerdo pa laga investiga e crimen aki, ta señal cu nan ta prefera di mata e Pueblo su cartera y tapa e crimen aki djies pa e Ministernan culpable por keda na poder. Pero e mundo aki ta lora y un dia e poder di mayoria lo caba y e autornan di e crimen aki lo haya nan castigo pa e crimen di hedging cometi contra e Pueblo di Aruba.


9 december 2015

Expresionnan haci den e articulo aki no necesariamente ta refleha opinion di ArenaPoliti.co