Increibel pero berdad: e cuatro di e shete miembronan di e fraccion di MEP cu tabata presente den Parlamento dialuna, a vota na fabor di cambionan den e ley cu AVP a presenta, pero nan a vota contra di e ley mes!  Ta manera cu nan no tabata sa kico nan a bin haci. Tabata obvio cu e miembronan di fraccion di MEP no a ni lesa e ley. Apenas nan a menciona algun punto cu nan a haya den weekend. E cuatro miembronan di MEP cu tabata presente a pasa henter e reunion ta stroba e reunion y interumpi esnan cu tabata hiba palabra. Un berguensa completo!

FRACCION DI AVP
E fraccion di AVP a prepara debidamente pa e reunion, a reuni di antemano cu hendenan cu ta traha den e ramo di cuido di nos grandinan y cu tin experiencia den e trabou aki. A base di esaki y di su propio analysis, a mustra cu riba diferente punto por y mester mehora e ley. Den e reunion a presenta pesey amienda y mocionnan pa trece cambionan desea door di expertonan y di fraccion di AVP mes. Di e forma aki atrobe e diferencia entre e dos partidonan a keda bon cla: MEP no ta bay trabou y ora nan presenta no ta traha al caso. E fraccion di AVP ta na trabou tur dia y ta prepara su mes bon. Esaki ta wordo demostra tambe den loke nan presenta y con ta trata e ley. Ta bon mes cu e reunionnan ta wordo transmiti na radio y television. Henter pueblo mes por wak ta ken ta traha y ken no ta ni presenta na trabou. Ken ta trata asuntonan di pueblo den forma serio y ken ta bin ta stroba.

Expresionnan haci den e articulo aki no necesariamente ta refleha opinion di ArenaPoliti.co