ORANJESTAD/PARIS - Prome Minister Eman y un delegacion ta na Paris atendiendo COP21 unda acuerdonan importante ta wordo cera y agenda 2030 di Nacionnan Uni pa SIDS (Small Islands Developing States) ta wordo defini y acorda. Na varios evento Prome Minister tabata orador y tambe a forma parti y guia diferente panel riba e situacion global pa loke ta e nivel di awa cu ta aumentando menasando existencia di hopi isla rond mundo, specialmente den Pacifico. Na e evento di nivel halto ‘SIDS Lighthouse Initiative’ organisa door di IRENA (International Renewable Energy Agency) Prome Minister a hiba palabra. Aki el a papia di e vision 2020 di Aruba, con a yega na ne y kico ta e siguiente pasonan cu falta pa tuma.

Eman a splica cu vision 2020 di Aruba a nace di un deseo social-economico pa bira un isla unda por traduci prosperidad economico den bienestar pa tur hende. “Turismo riba varios di e islanan ta creciendo y esaki ta bay man den man cu construccion di hotelnan. Pero ora nos wak e condicion di bida di hopi di nos hendenan y e prosperidad economico di nos hendenan, nos ta sinti cu tin un ‘gap’ entre e crecemento aki y e ciudadano”, Eman a bisa y a enfatisa su mensahe cu e ta hiba rond mundo cu nos no kier solamente hotelnan di cinco strea, pero scol, hospital, casnan di anciano, centronan di ciudad y barionan di cinco strea pa tur hende. Eman a splica cu e economia di Aruba ta wordo defini como un economia unda berdaderamente por tin equidad. Ora bo cuminsa traha pa logra esaki automatiamente bo ta yega na e punto con provee energia pa e comunidad. Esaki pasobra cu hopi di e placa mester bay den importa petroleo pa por genera energia. Asina a bira evidente cu mester tin un otro forma con por haci uzo di e fuentenan natural cu tin, manera solo y biento pa produci energia. “Asina nos a defini e meta principal pa tin un prosperidad comparti y sostenibel y e ambicion pa na 2020 nos ta completamente sostenibel.” Eman a conta esnan presente cu ya caba Aruba a yega na e capacidad di 30% di energia renobabel. E reto mas importante den esaki no ta con yega na financiamento, loke hopi por pensa, pero ta pa crea un bon comprension cu e companianan di utilidad. Nan kier sa kico nan posicion ta den e structura nobo den nan sistema convencional. “Ta dificil pa pidi un calacuna pa prepara un cena di Thanksgiving”, Eman a splica e situacion cu un metaforo chistoso. “Cu esaki mi kier ilustra cu e companianan di utilidad ta pensa cu esaki ta nan fin.” Eman a splica cu pa convence nan cu esaki no ta e caso, mester a traha un otro forma di funciona pa e companianan aki. “Esey ta loke nos ta haciendo awor, cu sosten di IRENA. Nos tabata importa 6 mil bari di crudo pisa tur dia. Awor nos ta importando 3.2 mil bari pa dia. Casi mita y esaki door di e transicion cu a wordo haci te awor. E ta evidente y e por wordo haci. Tecnologia y inversion ta importante, pero pa hopi pais y isla loke ta realmente importante ta convence e companianan di utilidad. Ta pesey mi ta pidi tur presente pensa riba un negoshi fuerte pa nan companianan di utilidad y haci nan partners den e proceso di transicion.”

Expresionnan haci den e articulo aki no necesariamente ta refleha opinion di ArenaPoliti.co