PARIS/ORANJESTAD - Den un reunion bilateral cu Prome Minister di Tuvalu sr. Enele Sopoaga kende ta atendiendo COP211 di Nacionnan Uni na Paris, Prome Minister Eman a papia riba cambio di clima y vision di Aruba. Sopoaga a bisa di honra cu e tin oportunidad pa papia cu Eman. “Despues di New York, mi ta haya agradabel y ta sinti mi honra di por papia cu bo atrobe”, el a bisa. Pa Tuvalu Aruba mescos Hulanda ta amigo y partnernan special. Ta pesey mes cu Tuvalu ta considera seriamente pa duna Hulanda su voto pa e haya e asiento den Conseho di Seguridad di Nacionnan Uni.

Prome Minister Sopoaga a stress riba e hecho cu mester bin cu un acuerdo legal na final di COP21. Esey ta un exigencia cu nan tin. “Pasobra si no bin un cambio den ‘global warming’ cu no mag di subi mas cu 1.5%, ta nifica cu hopi isla, entre nan Tuvalu, ta disparce y bay bou awa. Nos no mester ta fragmenta, pero forma un union pa para e tendencia aki. Nos ta spera cu den esaki nos tin Union Europa, cu ne Hulanda y Aruba pa duna nos sosten. Aki nos ta papia di bida di hende cu ta na peliger.”

Di su banda Prome Minister Eman a reitera di ta compronde e situacion alarmante cu Tuvalu ta den. “Pa nos cu ta biba riba un isla, nos por identifica nos mes cu e retonan cu boso ta confrontando, aunke cu Aruba no ta den un situacion agudo manera Tuvalu ta na e momentonan aki door di e efectonan di global warming. Pa nos e ta un situacion urgente, pero no tanto manera cerca boso. Na Aruba e zona costal ta masha cerca di nos hotelnan – turismo - cu ta representa 80% di nos economia.  Pesey mes nos ta compronde e preocupacionnan cu islanan den mundo, den Pacifico y sigur boso di Tuvalu tin, unda  bida di hende ta na peliger cu djis un poco aumento di e nivel di awa di lama. Ta pesey mes cu nos ta aki pa duna boso nos sosten den tur loke por haci pa evita loke por wordo evita.” Eman a bisa cu tin un acuerdo fuerte pa cambia e desaroyo di global warming. Mescos tambe boso por conta riba nos partnership pa seguridad di e ‘awa’ cu ta rondona boso.” Na final di e bilateral Eman a recorda Sopoaga cu embahador di Tuvula tabata na Aruba pa Green Conference y tabata impresiona cu e sistema di WEB NV unda ta converti awa di lama den awa di bebe. E ta un tecnologia cu definitivamente Aruba kier comparti cu Tuvalu, mescos tambe e esfuerzonan cu Aruba ta haciendo pa ta 100% sostenibel na 2020. “E ultimo aki ta un meta cu boso tambe tin”, Eman a bisa. “Nos tin hopi en comun. Ban traha hunto pa logra nos metanan”, tabata e contesta optimista di Sopoaga. Un bilateral fructifero.

Expresionnan haci den e articulo aki no necesariamente ta refleha opinion di ArenaPoliti.co