‎StrawberryGate, ‎KikoGomezGate‬, ‎ElPolloGate‬, ‎BushiriGate, ‎RinconGate‬ 

STA CRUZ – “Dicon Gabinete Mike Eman tin asina tanto problema cu integridad? Nan no por screen e hendenan cu nan ta "wheel and deal" y "wine and dine" cu nan? Y evita di pone nomber di ARUBA cada biaha den lus negativo? Nos a tende di cantidad di caso dudoso den cual politiconan di AVP ta wheel and deal cu hendenan dudoso. ‎ Strawberry-gate, Lainda-gate, Kiko Gomez-gate, Bushiri-gate y awor RINCON-gate y cuanto mas cu nos no sa di dje ainda
E problemanan serio di falta di integridad di e gobierno aki, no por wordo scondi mas, y pesey tur e escandalonan aki ta sali na lus di dia. Integridad por wordo salbaguardia sibo tin e leynan necesario, cual Aruba no tin y AVP no tin ningun intencion di pasa nan. Pero tambe si bo tin un ministerio publico cu ta controla y investiga e cosnan aki, cual tampoco ta pasa na Aruba. Y madre patria Hulanda ta bira cara y wak otro banda.
Integridad ta algo cu bo tin of bo no tin! Integridad ta ora bo ta hasi lo corecto, te hasta ora ningun hende ta wak. Pa nos di MEP integridad ta crucial den gobernacion, y pesey e tin un parti hopi importante den nos programa di campanja. Casonan manera Strawberry-gate, Lainda-gate, Kiko Gomez-gate, Bushiri-gate y awor RINCON-gate, tur a trese duda serio den integridad di gobernantenan di Aruba, no solamente serca nos, sino tambe serca politiconan den Reino. Nos mester evita e escandalonan aki y pesey Fraccion di MEP tin 4 anja ta bringa pa diferente ley wordo introdusi, entre otro, esun di financiamento di partidonan político, esun di screening di gobernantenan, introduccion di un Ombudsman caminda cuidadanonan por entrega keho, condigo di conducta pa asina evita cualquier duda cu gobernantenan ta privilegiando nan amigo y famianan, manera nos a mira ta sucede asina tanto den ultimo 5 anja. Demas paisnan den Reino tin practicamente tur e leynan aki caba ‘in place’, ta Aruba so falta.
E corupcion bou gobierno di AVP ta causante di e MEGA DEBE, pasobra ta debi na e pago di fabornan cu e diferente ministernan mester hasi na esnan cu a financia nan campanja, nan mester a endeuda nos pais di e forma aki.

RINCON-GATE
E caso di RINCON ta hayando un rabo mas largo awor cu e corant AweMainta a acusa gobernantenan di a "wheel and deal" y "wine and dine" cu Rincon. Mi ta puntra mi mes si parlamentario Melvin Tromp ta bai pone AweMainta rectifica awor, ya cu e no kier pa ningun hende papia di e tema aki. Y mi ta puntra mi mes cuanto tempo mas Mike Eman ta sigi core pa e asunto aki, y keda sin duna cara na pueblo. Tambe mi ta puntra mi mes si Ministerio Publico lo interumpi su sonjo pa investiga e caso aki. Locual si ami sa, ta cu husticia mericano si lo no drumi, y pronto e berdad lo sali na cla pa tur hende haya sa. Den acusacionnan cu Rincon a paga pa ticket y hotel pa mandatarionan di Aruba, nos kier prueba di tur e biahenan, y ken a paga pa kiko. Y si Mike Eman no kier duna nos, nos ta bai busca nan na Merca. Mike Eman, no manda parlamentarionan bin tira lodo. Djis bin cu prueba y refuta e acusacionnan aki”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co