Contra tur norma di bon gobernacion 

Segun e lider di Partido Democracia Real Andin Bikker, e gobierno na mando a perde tur principio di bon gobernacion. Algun luna pasa por a wak diferente escandalo caminda minister Benny Sevinger a duna un vergunning na un persona cu a keda deteni na Merca pa sospecha di soborno. 
Awor atrobe a tuma nota di un minister cu a haci peticion di un pida tereno pa planta y e asunto aki a keda regla lihe.
Awor hasta e fraccion cu ta sostene gobierno ta rabia cu Minister di Husticia pasobra tin cierto preguntanan y dudanan riba un compania cu ta huur un edificio di un hende ta hopi cerca di dje.
Bikker ta corda con den e campaña di 2009 AVP a cuestiona e gobierno prome cune di a wordo faborece hende y nan a tin cu e slogan di friends & family, pero su pregunta pa AVP ta anto aworaki kico ta pasando?
E ta haya cu e gobierno aki gusta di haya koningin besluit for di Hulanda y e actonan aki ta contra tur regla di integridad, segun Bikker.
Bikker ta haya cu nan ta pone Aruba bao riesgo y cu algo por sosode akinan manera na Sint Maarten caminda Hulanda a baha bin pone ordo mescos cu a pasa cu e CFT.
Andin a bisa cu durante e reunionnan reciente di IPKO na Hulanda, algun parlamentario a laga sa cu nan a tuma nota di cosnan cu ta pasa na Aruba y cu nan kier forza nos y tambe Curacao pa bin cu un Centrale Integriteitskamer. Esaki ta nifica un organo di vigilancia riba e integridad di gobernantenan di Reino, na locual PDR ta opone energicamente na dje. Sin embargo ta parce cu gobierno ta gusta pone nos autonomia na riesgo.
Segun Bikker si wak e ley di integridad di Sint Maarten, ta trata di normanan cu ta wordo kibra y cu no mester ta para den ley mes, pasobra ta nocionnan cu cada gobernante mester tin cu cosnan cu nan no mag haci. Por ehemplo, minister Otmar Oduber cu ta haci peticion di un tereno pa e bay planta riba dje. Ta cosnan cu den e fibra di un politico mester sa cu no por sosode.
Bikker a usa un dicho cu ta bisa “ora bo cuida mangel bo no tin mag di snoep” y pesey e ta mustra indigna cu mientras e gobernante tin cu cuida patrimonio di nos pueblo, pasobra e ta minister e ta haci un peticion y den un par di luna e ta regla. Tin hende cu tin decadanan ta wardando y tin hendenan cu nan tereno a wordo kita, pero e minister cu tin e posibilidad economico pa cumpra un tereno eigendom ta bin haci un peticion pa bo haye via huurground, y ta pretende cu esey por.
Bikker pa refresca e memoria Benny Sevinger, a corde cu un par di luna pasa na Fundacion pro Husticia mes, el a wordo mustra cartanan cu ta nenga hendenan humilde, cu ta haci peticion di tereno pa planta, a base di e ley di eigendom of a base di e ley di ordenamento teritorial.
Bikker ta puntra kico ta e concepto awor? Nos tin tin cu bay cumpra concomber na Cunuco di Ochi? Con leu nos ta bayendo? Con nan mes no por tin e nocion cu ora bo ta den gobierno, cierto cosnan no por? Ta preguntanan cu Andin Bikker ta haci. E ta sugeri minister Oduber pa hala e verzoek atras mesora y pidi despensa ya cu e cos aki no por. E ta puntra e minister con a drenta den su cabes pa pidi un tereno di tal magnitud pa e bay planta den su tempo liber, y sabiendo cu tin centenares di ciudadano cu a haci peticion y ta wardando hopi aña caba, of cu terenonan a wordo kita for di personanan humilde.
Bikker a bisa cu minister Sevinger ta argumenta cu den mas cu seis aña e no por a traha casnan social pasobra no tin tereno disponible, midimento ta tarda, pero si por a duna 50 mil meter cuadra aparentemente na su colega Otmar Oduber den tempo record.
Hulanda ta tuma nota di e cosnan aki, y lo bisa bo si localmente bo no tin nocion kico ta bon gobernacion, bo ta riesga cu ta Hulanda mes mester bin pone riba papel kico ta bon gobernacion pa bo marea ta e caso na Sint Maarten.
Bikker a bisa cu e kier hala atencion di Minister di Husticia pasobra articulo 3-14 di Codigo Civil, ta bisa cu bo no por usa autoridad contra principio di bon gobernacion y den e caso aki ta aplicable riba un tereno cu a ser pidi na huur cu ta contra principio di bon gobernacion, caminda e ta pasa riba tur otro hende, cu no sa masha bon cu no tin mag y ta bay contra norma di integridad.
Bikker a bisa cu e tin duda cu e contrato ey tin validez, y sr. Dowers mester lesa su landsverordening Instelling Ministeries como cu e ta e persona central cu ta conseha huridicamente full gobierno.
Bikker tin gana di tende di e minister si esaki ta conforme e reglanan di bon gobernacion y si ta conforme tambe cu articulo 3-14 di nos codigo civil.

Expresionnan haci den e articulo aki no necesariamente ta refleha opinion di ArenaPoliti.co