Cu e dicho popular na Hulandes “een zwaluw maakt nog geen zomer” nos por describi e cifranan preliminario di e ehecucion di e presupuesto di Pais Aruba durante e ultimo kwartaal di 2015 cu Minister Bermudez a presenta na Parlamento recientemente.

Un aña sin mucho movecion 
Ta bon pa recorda cu e presupuesto di 2015 a wordo entrega 9 luna mas laat cu ley ta prescirbi y a wordo aproba te na mei 2015 cual ta significa cu pa casi 5 luna largo Gabinete Eman tabata limita y no por a gasta fondo publico manera custumber. Fuera di esaki tabata tin discucion constante cu CFT cual tambe a stroba Gabinete Eman di haci dehaci y realisa e gastonan manera presupuesta. Pesey e cifranan preliminario di e ultimo kwartaal di 2015 ta mustra cu e gastonan di gobernacion a baha. Remarcabel ta cu gastonan necesario di subsidio no a keda realisa cu 6 miyon florin y cu inversion cu ya caba ta hopi abou, tambe a baha cu 2 miyon florin. Ta den e ambiente aki di poco movecion y di ‘getemperd uitgavenpatroon’ Gabinete Eman a logra tene gastonan mas abou cu premira.

Medida ultimo ora a scapa cara
Locual a scapa cara di Gabinete Eman ta e cobransa feroz di belasting atrasa den cual a saca 85.1 miyon florin di Pueblo. Banda di esaki e medida di ultimo ora, e VAS, pa e comerciantenan paga winstbelasting adelanta, a pone cu Gabinete Eman a haya 237,4 miyon florin di winstbelasting den 2015 cual ta 74,8 miyon florin mas cu gobierno a premira. Ta danki na e medida di ultimo ora aki combina cu e hecho cu a fia 12, 2 miyon florin menos, a pone cu Gabinete Eman por a saca cara y presenta cifranan preliminario na unda e deficit a keda na 2% enves di e 2,6% manera presupuesta y bou di 3,7% cual ta e norma den e Ley di CAFT. Falta Banco Central, Cuenta Annual 2015, investigacion di ARA y CFT
Mester tene na cuenta cu e cifranan presenta pa Minister Bermudez ainda ta preliminario. Ta te ora cu Banco Central publica e cifranan di e ultimo kwartaal di 2015 y cu e Cuenta Anual di Pais Aruba pa 2015 wordo presenta y investiga pa Algemene Rekenkamer (ARA), te na e momentonan ey nos lo por ta sigur cu locual Gabinete Eman ta presenta ta cuadra cu realidad. Sin lubida cu CFT tambe mester duna su punto di bista riba e cifranan presenta.

Duda si ta mehoracion structural
No ta pasobra cu e deficit presenta riba papel ta mas abou cu premira esaki kiermeen cu tabata tin mehoracion den locual ta e maneho financiero di nos Pais. Ya cu si no tabata tin tanto problema cu CFT, si no tabata tin medida di ultimo ora, e deficit lo tabata mas halto. Minister Eman riba su mes no tin boluntad pa trece mehoracion y esey instancianan manera Raad van Advies, ARA y CFT a confirma. E pregunta ta si pa 2016 y 2017 cu ta aña di eleccion Gabinete Eman por wanta e diciplina aki sin cu mester bende patrimonio di Pueblo, sin cu mester corta den gastonan necesario y sin cu mester perhudica e funcionamento di e departamentonan di Gobierno. Pasobra te ainda “een zwaluw maakt geen zomer.”

23 februari 2016

Expresionnan haci den e articulo aki no necesariamente ta refleha opinion di ArenaPoliti.co