E situacion financiero di nos Pais no ta bon y pa e motibo aki Aruba na e momentonan aki ta bou di supervicion financiero di CFT. Gabinete Eman desde 2010 a bin cu diferente plan cu e intencion pa drecha nos finanzas publico, pero te ainda ningun di e plannan aki a duna fruta. E motibo pa esaki ta simpel, Minister Eman no tin boluntad pa drecha e situacion financiero di nos Pais y instancianan manera CFT, Algemene Rekenkamer Aruba (ARA) y Raad van Advies a señala esaki. 

CFT ta mustra cu no a tuma ownership
Na fin di 2014 caba CFT a recomenda Gabinete Eman y den e caso aki Minister Eman pa tuma “ownership” pa asina por cumpli cu su mesun plan di Acuerdo di Balanced Budget. Riba pagina 5 di e rapport di 29 di December 2014 CFT ta indica cu e Minister di Finanzas so no por logra cumpli cu e plan di Gabinete Eman. Ta di sumo importancia pa Minister President asumi e rol di coordinador di henter e proceso aki y pesey CFT ta conseha pa Minister Eman bay na cabes di un grupo cu mester guia full e proceso pa yega na un presupuesto balansa. Ta pa motibo cu CFT a constata cu Minister Eman no tin boluntad pa drecha e situacion financiero di nos Pais, nan a duna e recomendacion aki.

ARA ta indica cu no a cumpli
Den su rapport riba e Cuenta Anual di Pais Aruba pa 2014, ARA riba pagina 4 tambe ta indica cu ta importante pa no laga e palabracionnan haci pa gobierno riba finanzas publico duradero solamente na palabra, pero pa cumpli tambe. Aunke cu ARA mes no ta mencione, ta bisto cu e frase aki ta toca Minister Eman. Ya cu e mandatario aki ta campion pa papia bunita y firma tur clase di protocol pero ora yega e momento di actua, e ta bula biba. Mira por ehempel e belasting di ABB cu mester a keda introduci den cuadro di e reforma financiero di Gabinete Eman. Manera cu Minister Bermudez a sali papia riba dje, mesora Minister Eman a manda bise pa e keda keto, no papia mas riba ABB y no tuma ningun accion mas pa bin cu e reforma aki. Ta como cu Minister Eman no tin boluntad pa mehora e situacion financiero pesey ARA ta duna e remarke aki.

Raad van Advies ta mustra cu no a actua
Dia 24 di juni 2015 Raad van Advies tambe a indica den su conseho na Gobernador y Minister di Husticia, cu nan ta lamenta cu Gabinete Eman no a actua y a deja pa cumpli cu e rekisitonan di e Acuerdo di Diahuebs Santo di 28 di mei 2013 pa por a baha e debe di nos Pais. Pues aki un biaha mas un instancia ta mustra cu Minister Eman no tin boluntad pa drecha e situacion financiero di nos Pais.


16 februari 2016

Expresionnan haci den e articulo aki no necesariamente ta refleha opinion di ArenaPoliti.co