Nos a tuma nota cu lider di fraccion di AVP den Parlamento kier tilda opocicion di ta ignorante y di no kier acepta cu e intervencion di Hulanda via KB na 2014 tabata un violacion di e derechonan di nos Pais. Esaki ta un reaccion tipico di un hende cu no kier realisa cu ta danki na su propio ignorancia Hulanda a haya caminda habri pa por a interveni na nos Pais cu tur e consecuencia cu esaki ta trece cune. Si nos mester papia di ignorancia anto ta bisto cu e unico ignorante ta esun cu a yuda Gabinete Eman manda nos Pais rumbo bancarota.

Intervencion no a cay foi shelo
E intervencion di Hulanda den e asuntonan financiero di nos Pais no a cay foi shelo. Tabata tin un trayectora largo su dilanti na unda cu no solamente e rapportnan di IMF, Standard and Poor’s, Fitch, Banco Central y consehonan di Raad van Advies a hunga un rol importante, pero nos no mester lubida tur e Protocolnan cu Minister Eman a fima na grandi cu Hulanda. Ta parce manera cu e lider di fraccion di AVP a lubida cu ela permiti Minister Eman firma tur e Protocolnan aki sin bin splica Parlamento PROMER kiko e consecuencia lo ta pa nos Pais y sigur pa nos pocicion autonomo den Reino. Ta solamente un parlamentario cu no kier asumi su responsabilidad lo tabata asina ignorante di laga Minister Eman bay firma sin sa e consecuencia. Pasobra ya caba for di 2013 Minister Eman a firma pa e supervicion financiero di CFT cu awe ta activo na nos Pais. Pero ta cumbini e lider di fraccion di AVP pa no mira ni bisa e berdad aki.

Sostene presupuesto irealistico
Ta parce manera cu e lider di fraccion di AVP no a compronde e consehonan cu Raad van Advies a duna na e presupuestonan di nos Pais den e ultimo añanan. Tur a bin cu e seyo irealistico di Raad van Advies, pero asina mes pa interes partidista a ignora e berdad y a vota pro pa duna Gabinete Eman tur poder pa haci deshaci cu e finanzas publico di nos Pais te na e extremo di hiba nos Pais rumbo bancarota. Esaki ta locual nos ta yama ignorancia optima forma djies pa proteha interes partidista.

Acepta cu a faya den controla Gabinete Eman
Enves di sinta tilda opocicion di ta ignorante y no ta defende interesnan di nos Pais, lo ta bon pa e lider di fraccion di AVP reflecciona riba nan propio ignorancia cu a brinda Hulanda tur espacio pa interveni den asuntonan di nos Pais. E lider di AVP lo haci bon si e acepta cu nan a faya barbaramente den nan trabou di controla Gabinete Eman den interes general di nos Pais. Si solamente e fraccion di AVP por a laga interes partidista un banda y percura pa haci nan trabou di controla Gabinete Eman manera debe ser, awe nos por a evita e berguensa di un intervencion di Hulanda. Lo ta bon pa e lider y henter e fraccion di AVP realisa cu e unico ignorante ta esun cu a yuda Gabinete Eman manda nos Pais rumbo bancarota.


12 oktober 2015

Expresionnan haci den e articulo aki no necesariamente ta refleha opinion di ArenaPoliti.co