Firmamento di e presupuesto y e presupuesto-supletorio 2014 ta marca final di e proceso largo y dificil di e presupuesto di gobierno pa aña 2014. Awor ta sigui e presupuestonan pa e añanan 2015 pa 2018 cu ta cai den e programa di e acuerdo di "Balanced Budget" cu fraccion di AVP a firma hunto cu gabinete Mike Eman II. Den e periodo 2014-2018 lo baha e gastonan di gobierno y elimina e deficit (=falta di placa o placa cu mester fia pa por cubri tur e gastonan di gobierno).  Nan ta bay ta añanan dificil, pero e resultado lo ta bon pa nos tur. Manera e calculacion di entrada y gastonan di gobierno te 2018 ta mustra, e cantidad di placa cu gobierno ta bay fia ta baha tur aña. Na 2018 lo tin un surplus riba presupuesto (= mas placa ta drenta cu tin cu paga na gastonan) di 0.5% di GDP. Na e momento ey lo mantene e maneho financiero estricto y cuminsa paga debenan cu a acumula for di 1986. (Di 32 aña!) Den e mes un periodo di 2014-2018 e debe total mes lo cuminsa baha pa yega na 77.3%. Den e añanan despues e lo sigui baha. Esaki ta e maneho financiero cu a wordo presenta na pueblo den eleccion di september 2013. E ehecucion ta tumando luga awor. Compara cu hopi pais rond di mundo, incluso paisnan grandi di Europa y Sur America, e proceso pa yega na presupuestonan balansa y finansa publico sostenibel, e proceso cu Aruba ta ehecuta ta duna miho resultado mas lihe y sin afecta forsa di compra y calidad di servicionan publico pa esnan cu menos entrada. Esaki ta loke gobierno di AVP y fraccion di AVP a scohe pe.

NORMANAN FINANCIERO NOBO
Un otro parti di e acuerdo di "Balanced Budget" y e programa pa yega na finansa publico sostenibel, ta pa preveni cu Aruba, bou cua gobierno cu ta den futuro, haya su mes den problemanan financiero cu e no por sali for didje riba propio forsa. Ora gobierno su situacion financiero ta debil e ta afecta henter nos pais. Ta solamente si tin un gobierno na mando cu ta cuida esnan cu un entrada chikito of un pensioen chikito di SVB so, lo por evita decadencia social. Como cu no semper lo por sigura cu lo tin un gobierno cu ta hiba un maneho socio-economico balansa, manera ta e caso awor aki, mester fiha normanan cu ta preveni un maneho descabeya of un maneho di previlegio politico manera nos a wak den e añanan 2001-2009. Pesey ta bay fiha normanan financiero nobo y ancra esakinan den Constitucion di nos pais. Di e forma aki no por cambia of kita for di e normanan aki facilmente. E normanan financiero aki, cu un base legal den constitucion, lo haci cu niun gobierno lo por haci gastonan inresponsabel cu pueblo no ta haya niun beneficio di nan y na mes un momento pone sostenebilidad di nos pais na peliger. Lo trata e normanan nobo aki prome cu fin di aña 2015. Hunto cu e normanan financiero aki, lo introduci e Fiscal Council di Aruba cu lo controla cumplimento cu e normanan nobo y cu lo duna conseho riba e desaroyo y maneho financiero di Aruba den futuro.

A puntra Rene Herde' kico e ta haya di e plannan aki:"Esaki ta exactamente loke nos a dicidi pa haci for di prome cu eleccion 2013. E ta loke nos a bisa y scirbi. Awor nos ta haci'e. E rol grandi di gobierno den desaroyo di nos pais mester ta uno di stimula y facilita desaroyo. Na mes un momento gobierno mester cuida esanan cu entrada mas chikito manera e trahadornan cu salario minimo y un tiki mas y pensionadonan di SVB cu tin un pensioen so. Esey ta e maneho cu nos a scohe pe. Tur loke nos a haci for di 2009 y tur loke nos lo haci den añanan cu ta bin ta cuadra cu e metanan aki."

Expresionnan haci den e articulo aki no necesariamente ta refleha opinion di ArenaPoliti.co