Pero cu experiencia real si ta demostra! 

Den e campaña di propaganda pa wordo accepta den comunidad di Aruba, CFT ta conta masha bunita cu nan ta imparcial y cu nan trabou ta limita na duna conseho. CFT kier hasta crea e impresion cu nan tin un contribucion positivo na desaroyo di e pais. Nos di AVP a y ta sigui mustra nos comunidad cu e impresion cu CFT kier crea no ta corecto. E asercamento di CFT ta uno strictamente pa yega mas lihe posibel na un balansa di finansa publico. Nada mas. Pa logra esaki tur otro area di pais ta wordo lubida. E consecuencianan pa economia, cuponan di trabou y bida social den comunidad no ta conta. Pa esnan cu no kier kere, wak e consecuencia di cinco aña di CFT na nos hermana isla Corsow. Wak con Corsow ta awe cinco aña despues cu CFT a tuma finansa publico over, a impone medida y stagna economia. Esaki ta loke nos di AVP no kier pa Aruba.

EXPERIENCIA DI CORSOW
E conocido empresario jiu di Corsow, sr. Ron Gomes Casseres ta duna comentario regularmente den un corant Hulandes di Corsow. Den diferente articulo sr. Casseres a comenta riba e stagnacion di economia di su isla Corsow. Esaki ta over di e mes un periodo cu CFT a haya dominio riba finansa di gobierno y riba e rol determinante di gobierno den desaroyo financiero, economico y social di Corsow. Den su articulo di dia 17 di september 2014, sr. Casseres cu conoce finansa publico, politica, economia y bida social di Corsow masha masha bon, ta bisa entre otro lo siguiente referiendo na e discucion riba crecemento economico di Corsow: "...e discucion real mester ta pakico aki na Corsow nos (economia) ta stagna pa añanan caba rond di cero% mientras cu por ehempel Aruba a logra un crecemento economico real di 3.9% na 2013." E ta papiando di e mes un periodo di cinco aña (2010-2014) cu CFT ta opera na Corsow. E asercamento misquino di CFT pa purba sanea finansa publico sin wak e consecuencia di e proposicionnan cu nan ta impone, a duna e resultado negativo aki. Den un otro articulo di dia 17 di januari 2015 sr. Ron Gomes Casseres ta urgi pa tur sector di Corsow fiha metanan comun y traha mas hunto. Den e articulo aki e ta papia di e cinco añanan debil ("Vijf zwakke jaren") di Economia di Corsow. E mes un cinco aña cu CFT ta opera na Corsow. Den e articulo aki e ta bisa: "No ta cu gobierno ta haci nada pa stimula economia, pero si wak e ultimo cuatro aña, 2011-2014, e crecemento real tabata +0.6%, -0.1%, -0.8%, -0.5%. Bo mester puntra bo mes e ora ta kico ta malo cu den cinco aña nos no por a yega na un crecemento economico solido, mientras cu rond di nos den mundo esey si ta sosode."

CONSECUENCIANAN SOCIAL
Esey tabata e efecto directo di e maneho financiero y economico pa e desaroyo di Corsow. Sr. Ron Gomes Casseres ta menciona tambe e consecuencianan pa otro areanan di su isla: "E añanan debil ey a haci hopi hende dolor, sin conta e aumento di primanan social y edad di pensioen. Djies pensa riba e desempleo cu a subi, criminalidad cu a aumenta, companianan cu a sera y edificionan bashi." Esaki ta exactamente e consecuencianan cu CFT no ta papia didje y cu nos di AVP a y ta adverti p'e. Ta pa e consecuencianan negativo pa economia di nos pais y pa e consecuencianan social y laboral egativo aki cu bo ta wak na Hulanda tambe, cu nos a scohe pa un otro asercamento. Uno balansa, den cua gradualmente ta baha gasto di gobierno, gradualmente y den forma responsabel ta aumenta e entradanan, mientras cu na mes un momento ta stimula economia y creasion di trabou den sector priva. Asina gradualmente por baha e cantidad di hende cu ta traha den gobierno. E maneho cu AVP a hiba a logra un aumento economico cu hopi pais, manera Corsow tambe kier y merece. E ta e desaroyo social di creasion di mas cupo di trabou y menos problema social cu Corsow y tur otro pais tambe kier y merece. Pero den e campaña di propaganda cu CFT ta hibando na Aruba nan no ta menciona e consecuencianan aki. Mescos cu Aruba, Corsow y St. Maarten merece miho. Pero hasta esey oposicion na Aruba hunto cu nam CFT no kier pa nan tambe tin.  

Expresionnan haci den e articulo aki no necesariamente ta refleha opinion di ArenaPoliti.co