Na Aruba tin 8000 famia cu no tin coriente na nan cas. E cantidad di mucha cu ta wordo afecta door di esaki, door cu nan no por studia despues cu solo a baha, ainda no ta conosi. E efecto cu esaki den klas, riba tur mucha y e maestronan tampoco. Con esaki ta afecta Enseñansa na Aruba, tampoco ta conosi. Pa colmo, cifra annual di Enseñansa na Aruba, cu Minister Hooyboer-Winklaar mester produci, continuamente ta casi dos aña atrasa y asina e ta casi imposibel pa nos por ataca e problemanan cu solucionnan. Un solucion por ehempel ta, pa regala tur cas un Solar-LED-Lamp.

SOLAR-LED-LAMP
Un hoben di Nairobi, Evans Wadongo a inventa un Solar-LED-Lamp na 2011. E mes, mester a siña su lesnan cu un lampi di kerosine, cu ta produci hopi huma, cual e tiki luz y e huma a daña su wowonan permanente. Pero toch el a logra bay Universidad pa studia pa engeniero. Cu 19 aña el a inventa un solar-LED- luz. Esaki awor ta yuda mas cu 15.000 famia na Nairobi caba. Den poco aña el a wak e muchanan di su propio communidad logra drenta scol basico of di scol basico progresa pa scol secondario. Solamente pasobra nan tin luz den cas anochi. E placa cu e mayornan ta spaar, door cu nan no mester cumpra kerosine mas, conhuntamente ta wordo inverti den projectonan cu ta duna un Return of Investment (ROI), manera pa cria bestia chikito.

HEDGING Y MAS MAL MANEHO
Awor ban bek na e situacion na Aruba. Nos Minister President, a sera un contract cu Philips y el a instala miles di LED pa ilumina nos cayanan. Philips mes mester a keda contento cu e por a deshaci di su producto inferior pa Aruba, pasobra hopi luz a kibra caba. E pregunta ta, kico Minister President kier a logra cu esaki? Mike Eman a bisa cu e luz di LED ta trece mas seguridad pa nos como pueblo. Ok, e tin rason eynan. Pero kico ta e causa di e inseguridad? Tin miles di prueba scientifico cu ta bisa cu criminalidad den un pais ta baha ora e nivel di educacion ta subi. Na Aruba tin 8000 cas sin coriente. Mayoria di e casnan ta cas di famia caminda lo por tin un, dos of mas yiu bibando. Si e presencia di luz anochi, por laga resultadonan academico subi na un pais na Africa, Minister Presidente Mike Eman, bo no ta kere cu falta di coriente por laga e resultadonan escolar di nos muchanan baha? Door di e mal maneho di Mike Eman, nos ta mara na un hedging contract di Minister Mike De Meza. Esey ta e motibo cu aunque mas cu 40% di nos energia ta bin di Solar Panels, cu ainda nos prijs di coriente ta astronomico halto.

CUANTO MUCHA TIN SIN LUZ NA CAS?
Si den solamente 10% di e 8000 casnan sin coriente na Aruba, tin un (1) mucha ta biba cu ta bay scol basico of scol secondario, nos ta papia di un cantidad di 800 mucha cu no por studia despues cu solo a baha! Pero nos tur sa cu ta net e famianan cu tin yiu, ta esnan cu ta bringa pa por paga tur nan gastonan, pues e cantidad lo por ta hopi mas halto en realidad. Por ta e ta 1600 mucha, por ta e ta mas ainda. Con un mucha lo sinti, si e sa cu e no por studia ora solo a baha? Ta pesey, ami ta recommenda pueblo di Aruba, pa wak kico Gobierno di Mike Eman II ta 'regala' nos. Unda su prioridadnan ta. Pa wak unda precies nos placa ta bay. Nos kier luz di LED riba caya so of den nos cas tambe? E no ta posibel pa cada cas na Aruba tin por lo menos un lampi di luz? Pa ningun cas keda scur?

PRIORIDADNAN ROBEZ
Di tur e biahenan haci y daggeld vergoeding di un luna, nos por regala tur 8000 famia un Solar-LED-lamp. Di e placa di un banner di AWG 350.000, cu Minister Otmar Oduber a aloca pa Arubadag na Hulanda, nos por regala 20.000 mucha un buki di tarea, enbes cu nan tin cu traha cu copia di copia di copia. Cu e placa di e contract di seguro di Insure 2 Study, di Minister Michelle Hooyboer-Winklaar, nos por a percura pa nos studiantenan na Hulanda por a wordo informa debidamente. Pasobra nan tur, si, cada studiante di Aruba na Hulanda, tin derecho pa aplica pa 30 minuut di tempo extra, pa cada tentamen cu nan mester haci. Incluso uzo di un dictionario!! E projecto social di Dowers ta necessario, pero pakico Dowers y Paul Croes no ta aloca placa pa traha riba prevencion di problemanan social y caba cu e high season di criminalidad? Simplemente luz den 8000 cas anochi, lo por trece bienestar y felicidad pa tur e muchanan cu ta biba den un cas sin coriente.

SOLO TA SALI
E ta hopi tristo mes, pa wak con desde 2009, generacion tras di generacion ta wordo perhudica door di e mal maneho di AVP. Un maneho cu ta na bienestar di nan mes y e companianan cu nan ta traha nan PPP contractnan cu n'e. Locual ta hopi mas grave di nan mal maneho, ta cu asina AVP ta percura pa pueblo di Aruba bira asina pober y mal educa, cu AVP por keda na poder. Ta pesey, wak bon kico Mike Eman ta regala bo. Luz riba caya ta importante, pero e no lo ta hopi mas miho, si nos muchanan y hobennan por sinta sigur y comodo den nan propio cas pa studia? Na tur e famianan cu ta pasa den temporadonan duro pavia di e mal
Maneho di Mike Eman y su Ministernan, mi kier bisa cu mas pronto posibel, MEP lo percura pa solo sali pa nos tur. #MSJMEP

Expresionnan haci den e articulo aki no necesariamente ta refleha opinion di ArenaPoliti.co