Nos ta un partido progresivo. Nos mester sigui trece cambio! 

"Diariamente tin asuntonan cu ta exigi tur atencion y cu no ta laga espacio pa pensa riba nada otro. Esey ta conta sigur pa  gobernantenan y partidonan politico. Pueblo ta spera solucionnan pa asuntonan cu ta importante pa nan. Tin biaha ta asuntonan asina urgente cu nan ta exigi atencion y solucion mes ora. Sinembargo, mientras cu ta atende cu e asuntonan urgente asina, nos mester wak padilanti y atende cu e temanan cu lo determina nos futuro tambe. E criterio di bon gobernacion ta pa haya e balansa entre atende asuntonan actual y crea e futuro miho pa nos jiunan y nan jiunan."  Den combersacion cu Rene Herde, lider di fraccion di AVP y miembro activo di e partido pa mas cu 25 aña, riba asuntonan cu mester atende den añanan nos dilanti, ela duna un bista di un persona y un partido cu tin ideanan fresco y innovativo pa futuro. E lema "No para keto, sino bo ta bay atras" ta sobresali den su pensamento.

GOBERNA AWE CU FUTURO DEN MENTE
Segun Rene Herde, gobernacion semper mester actua cu futuro den mente. Niun solucion ta suficientemente bon si e no ta duradero. Esey kier men cu tur problema mester wordo soluciona di tal forma cu ta preveni repiticion den futuro. Si no haci esey, e solucion ta temporal. Tur solucion temporal ta mas caro y hopi biaha ta djies hala e problema padilanti. Rene Herde ta duna algun ehempel di gobernacion den añanan di su partido AVP. Rene Herde: "Ora nos mester a saca politica for di dunamento di beca pa estudio, nos a scohe pa un sistema di fiansa cu tur hende por haya y cu niun politica envolvi den dje. Enbes di laga 40 studiante bay studia pa aña, nos a percura pa den 30 aña mas cu 15 mil studiante por a bay studia aki na Aruba y den exterior. A soluciona e problema y mes ora a crea oportunidad pa tur den futuro. Awor ta tempo pa soluciona e retonan nobo pa sigura tur hoben oportunidad pa estudio den futuro, sin crea debenan grandi." Un otro ehempel cu Rene Herde a duna ta e forma cu a soluciona cu e caida enorme den economia di Aruba door di e triple crisis cu Aruba a pasa aden den añanan 2000-2009. Hopi experto a pensa cu hamas Aruba lo por a sali di e crisis ey. E refineria tabata sera. Turismo tabata bayendo malo. Desempleo a subi te 12%. Costo di bida a subi cu 24%. Fondonan social tabata casi bancarota. Inversionnan a cay y e infrastructura fisico y social di Aruba a deteriora. Niun hende tabata tin solucion. Rene Herde': "Enbez di haci loke tur otro pais tabata haci y cu gobierno Hulandes a conseha pa haci, esta corta casto y kita hende fo'i trabou, nos a scohe pa saca nos economia for di e abismo, como prome fase den drecha e situacion di henter Aruba. E mforma cu nos a haci'e tabata pa combina diferente accion riba diferente tereno y asina soluciona diferente otro problema cu tabata urgente riba mesa. Nos a scohe pa saca economia for di e abismo y pone mas hende bek na trabou, door di enfoca riba solucionnan duradero. Solucionnan cu lo crea oportunidadnan economico, trabou, desaroyo y seguridad nobo pa futuro. Wak e resultado di e escohencianan ey awe. Nos economia a sali di -13% y crece pa + 2% atrobe. Miles di hende a haya trabou atrobe. Entradanan cu a cay atras a subi pa un parti grandi di comunidad. Fondonan di seguridad ta stabiel atrobe pa hopi aña den futuro. Nos infrastructura fisico ta wordo modernisa y lo ta den bon condicion pa benidero 30 pa 40 aña. Awor por sigui atende cu e problemanan den aparato di gobierno, pero sin e presion cu tabata tin den e situacion di crisis di 2009. Ta asina, cu bista riba futuro, nos a y mester sigui maneha nos pais riba tur tereno!" Asina Rene Herde a splica.

Expresionnan haci den e articulo aki no necesariamente ta refleha opinion di ArenaPoliti.co