ORANJESTAD- Na 2010 a inicia cu e proyecto grandi pa revitalisa centronan di ciudad. Esaki a sosode den e tempo di crisis financiero cu tabata azotando mundo y naturalmente Aruba tambe a sinti e efectonan di esaki. Apesar di e crisis aki Gabinete Mike Eman I a dicidi cu ta sigui cu e plannan cu tabatin riba mesa y pa no sinta warda pa e crisis pasa. Prome Minister Mike Eman a splica den detaye e pakico di e decision aki e tempo ey. Un decision cu a haya critica y awe por contra aresta nan un pa un. A haci e inversionnan aki pa crea trabou y hunto cu ne crecemento economico y usando e concepto PPP, e pagamento bek tin un duracion di 20 aña.

 Eman: “Tempo cu nos a inicia cu e proyecto di embeyecimento di centro di ciudad, nos a haya bishita di e asociacion di cruceronan (FCCA) cu a expresa cu locual Aruba ta haciendo riba tereno di infrastructura pa loke ta desaroyo di centro di ciudad y mehorando asina producto Aruba, ya caba tabata algo excepcional.”

Area crucero
Eman a recorda cu e tempo ey no a cuminsa ainda cu mudamento di e containerhaven pa Barcadera, algo cu sin duda ta bay haci un diferencia grandi pa e area crucero. “E area aki ta bay bira hopi interesante pa un desaroyo positivo, sin cu ta bay tin un impacto grandi di construccion, pasobra kier habri e bista pa lama. E construccion ta bay ta uno di ‘low impact’ pa di e forma aki e lama ta bira visibel bek pa tanto e ciudadano como e turista. Door di tanto warehouse y container cu tin eybanda pa hopi aña caba e bista di lama a bay perdi y awor ta restora esaki.” Eman a enfatisa cu pa gobierno ta importante cu e area aki di barconan crucero ta bira liber pa asina e por wordo desaroya y finalmente conecta cu centro di ciudad.

Inversionnan nobo pa Aruba
E cantidad di oportunidad cu e desaroyonan aki ta bay crea a pone cu Minister de Meza, Minister Sevinger y Minister President Eman dentro di algun siman ta bay presenta un proyecto grandi di oportunidadnan di inversion nobo na Aruba. Eman ta splica: “Esaki ta un forum caminda e proyecto di containerhaven, di e hospital renoba, di waf di crucero, di Green Corridor y Watty Vos Boulevard ta wordo presenta dentro di e contexto di e regimen fiscal nobo – esun di Zona Liber, di Green y esun di San Nicolas – pa duna un apertura na un desaroyo economico nobo basa riba inversionnan cu ta bira posibel pa motibo di e cambionan grandi aki den infrastructura di pais Aruba.”

Inversion den infrastructura necesario y beneficioso
Eman a splica cu el a participa den un conferencia global na Toronto algun dia pasa. “Nos a wordo invita pa presenta e vision di Aruba con nos a conecta desaroyo economico na esun social y di bienestar general. Despues di a participa tambe den panelnan, lidernan tanto industrial, economico como politico, a enfatisa cu e paisnan cu mas ta crece y cu mas ta distingui nan mes y cu mas ta crea bienestar pa nan hendenan, ta e paisnan cu ta inverti den nan infrastructura.” Eman un biaha mas a subraya cu hopi bes ta tende comentarionan cu e momento no ta oportuno pa motibo cu ta tempo di austeridad. “Obviamente esnan cu ta bisa esaki no ta comrponde dos concepto. Uno: Na momento cu un pais ta pasa den retonan economico ta e momento adecua pa inversionnan tuma lugar pa stimula creacion di trabou y crecemento economico. Dos: Loke ta haci’e hopi interesante ta ora por haci’e den e concepto di PPP. Su impacto economico ta awor y su creacion di trabou di inmediato, pero e peso di paga bek ta durante 20 aña. E argumento cu e momento aki no ta oportuno no ta cuadra tampoco”.

Expresionnan haci den e articulo aki no necesariamente ta refleha opinion di ArenaPoliti.co