ORANJESTAD – Den e delegacion cu a biaha pa Cuba recientemente tambe tabata presente director interino di Departamento di Relacionnan Exterior di Aruba Edwin Abath. E delegacion aki a wordo lidera pa Minister di Turismo Otmar Oduber, kende a participa den e di 60 Conferencia Regional di World Tourismo Organization di Nacionnan Uni.  

Manera ta conoci, desde cu Cuba a cuminsa habri su portanan pa mundo, varios pais a cuminsa sondea e posibilidad con pa traha cu e isla grandi aki di Caribe cu tin hopi potencial, principalmente riba tereno di turismo cu nan bin ta desaroyando ultimo añanan. “Nos ta kere cu ceramento di aliansa cu un gigante asina aki ta na su luga, ya cu por haci uzo di e momento pa indica kico cada un ta nifica pa otro. Cuba tin hopi a siña di e experticio di casi 50 aña cu nos tin tras di lomba. E ta un experticio cu nos por ofrece Cuba,” Abath a splica. Y sigui bisa cu di otro banda e interes pa Cuba ta trece mas trafico den e area aki, cual lo pone atencion tambe pa Arua. “E ta e momento husto pa cera e aliansa aki pa medio di e MOU cera riba tereno di Turismo, Agricultura, Transporte y Cultura. Ta bay mira con nos ta bay complementa otro.”

E ehecutivo di Departamento di Relacion Exterior a sinti un interes grandi di Ministernan di Cuba pa e Aliansa nobo cu Aruba. Den esaki, Embahada di Reino estableci na Cuba tin su conexionnan cu por identifica tur e oportunidadnan cu por beneficia Aruba. Ya caba nan a duna un contribucion grandi pa firmamento di e MOU pa yega na un cooperacion estrecho entre Cuba y Aruba.

Esaki no ta prome biaha cu tin un relacion estrecho entre Aruba y Cuba, pasobra no mester lubida cu na inicio di siglo pasa un cantidad grandi di ciudadanonan di Aruba a biaha pa Cuba pa traha den tereno di cortamento di caña.

Expresionnan haci den e articulo aki no necesariamente ta refleha opinion di ArenaPoliti.co