Mi a haci uzo di mi tempo liber riba dia di Mama, pa pasa door di e jaarverslagennan cu ta riba e webpage di Gobierno: www.ea.aw. Mi mester bisa cu mi  a keda sorprendi ora mi a wak cu e ultimo jaarverslag di 2014 cu a wordo publica na maart 2016 no tawata disponibel mas riba e website aki. Kizas e cantidad di critica cu e prome verslag annual di Minister Hooyboer-Winklaar a ricibi a pone cu Minister a pidi pa su coordinadornan bay drech'e? Pues, e ultimo cifranan disponibel, ta esnan cu ex-Minister di Enseñansa Arthur Dowers a laga tras pa nos na 2013. 

A base di esey mi a traha algun charts di aña 2004 e aña cu partido MEP a introduci Ciclo Basico te cu aña 2013. E biaha aki mi kier pone atencion na e cantidad di studiante cu ta bay scol secondario y e maneho di Minister Hooyboer-Winklaar pa yega crea un Kennis Economie, pues un Economia di Conocemento. Den otro paisnan den Reino, un maneho asina ta ensera cu bo kier logra pa mas o menos 50% di e alumnonan cu ta sali di scol basico logra caba Scol Secondario (SS) cu un diploma riba e nivel di Havo/VWO. Nan por cuminsa den  Reino Hulandes na MAVO,  VMBO-TL of VSBO pero na final nan mester por sigui studia riba e   nivel di Havo. 

Mi a keda sorprendi, un biaha mas, ora mi a realisa cu enbes di subi, e cantidad di studiante cu ta bay Havo a baha, mientras cu e cantidad di studiante na Mavo a subi drasticamente. Cu un aumento alumno di 5%, e lo ta normal pa e cantidad di studiante cu ta bay Havo tambe subi. A contrario! Ademas, mi ta lamenta  cu e cifranan di 2014 y 2015 no ta disponibel ainda, aunque nos ta yegando e tempo di examen di 2016 caba!! Nos falta e jaarverslag di 2013/2014, 2014/2015 y fin di e aña scolar aki nos lo falta esun di 2015/2016 tambe. Cifranan hopi importante pa por adapta e maneho na un manera adecua. 

Mi a limita mi mes na cinco preguntanan cu tin un prioridad grandi pa haya un contesta: 

1) Si ainda falta jaarverslag di aña 2014 y 2015 riba www.ea.aw, con  Minister kier pa e scolnan por fiha riba un miho futuro si falta resultadonan di pasado? 

2) Con e por ta posibel cu e cantidad di alumno di Scol Secondario (SS) a subi cu 5%% den e ultimo añanan pero solamenta na Mavo e cantidad di alumno den SS en total a crece cu 6,9%, mientras cu na Havo/VWO el a hasta BAHA cu 3%? 

3) Con e por ta posibel cu e porcentage di alumno cu ta inscribi na Havo/VWO na Aruba ta 29,2% (2013) mientras cu na e otro paisnan den reino e ta riba 40% te cu hasta 50%? 

4) Si e maneho di Minister ta pa logra un Economia di Conocemento, pakico e ta stroba studiantenan cu a logra nan Mavo pa sigui studia riba e nivel di Havo y pakico e exigencianan pa por bin na remarke pa haci e Colegio Toets a bolbe cambia na Januari 2016 (effective immediately)? 

5) Con Minister por aclarea cu si e maneho ta pa stimula pa nos studiantenan sigui studia na Aruba mes of den regio, cu Gobierno di Mike Eman por a mishi cu e cartera di Educacion? E cartera cu Minister Micjelle Hooyboer-Winklaar mester a defende cu su curpa y alma? Pasobra soor cu e subsidio a baha, Universidad dinArub (UA) a subi e collegegeld di AWG 1200 pa AWG 2500. Un aumento di 108%. Mientras  varios paisnan na Europa (Scandinavia, Alemania), ta ofrece estudio Post Secondario (PS) na Ingles y por  NADA? Cierto estudio na UA a hasta subi di AWG 1200 pa AWG 4500, cual su effecto lo bira visibel den futuro. 

Mi ta spera di haya un contesta di Minister Hooyboer-Winklaar. No solamente pa mi mes, pero pa pueblo di Aruba en general y pa  nos studiantenan, pa nan mayornan y nan maestronan. Pasobra e ta obvio cu pueblo merece hopi y hopi mas miho! 

Expresionnan haci den e articulo aki no necesariamente ta refleha opinion di ArenaPoliti.co